Consul General nobo di Venezuela pa Aruba a cuminsa traha

ORANJESTAD – Consul General nobo Venezolano pa Aruba Carlos Jose Mata Figueroa ta na Aruba caba y a cuminsa traha. E consulado Venezolano a confirma esaki pa NoticiaCla.com e siman aki. E consul nobo a keda apunta comienso di aña pero mester a warda su credencialnan for di Hulanda, cual a keda cla recientemente. Unabez cu esaki tabata cla, e por a biaha pa Aruba y cuminsa eherce su labornan nobo. A compronde cu dentro di poco e lo bishita tanto Prome Minister di Aruba Evelyn Wever Croes como Gobernador Alfonso Boekhoudt pa introduci su mes den e funcion.

APROBACION CREDENCIAL

Gobierno di Reino a aproba nombracion di consul nobo di Venezuela pa Aruba Carlos Jose Mata Figueroa di 1 di mei ultimo manera NoticiaCla a raporta anteriormente. Tabata gobierno di Aruba cu a informa esaki pa medio di un comunicado.

CUESTIONA CONSUL

Un otro asunto cu a keda aclarea tambe tabata e decision di Hulanda pa aproba e credencial di e consul nobo. Hulanda su gobierno a contesta su propio parlamentarionan hopi directo: E consul general nobo di Venezuela apunta pa Aruba Carlos Mata Figueroa ta keda vigente. “Mi no ta mira motibo pa revoca mi decision (pa reconoce e consul Mata Figueroa)” Stef Blok, minister Hulandes pa relacionnan Exterior a contesta dos parlamentario Hulandes Raymond de Roon y Machiel de Graaf (ambos PVV) . Tabata den un carta recien cu dos parlamentarionan menciona, a cuestiona e reconocemento di gobierno di Reino Hulandes pa Mata Figueroa bira e proximo consul di Venezuela na Aruba debi na supuesto lasonan criminal. Un corant Hulandes a tilda e persona te hasta di ta un baron di droga. Basa riba informacion ey, e preguntanan a keda manda na e mandatario Hulandes.

E CASO

Ta dia 21 di februari ultimo gobierno di Venezuela a pidi Ministerio di Asuntonan Exterior di Reino pa bay di acuerdo cu nombracion di Figueroa como e consul general nobo di Venezuela na Aruba. Dia 27 di februari Ministerio di Relacionnan Exterior di Hulanda a informa cu lo tuma e peticion den tratamento. E procedura a cana su curso normal y recientemente a finaliza y dia 1 di mei Venezuela a wordo informa cu Reino ta bay di acuerdo cu su admision.