Parlamentarionan Hulandes ta cuestiona nombracion Consul Venezolano nobo pa Aruba

DEN HAAG – Parlamentarionan Hulandes ta cuestiona nombracion di e consul Venezolano nobo Carlos Figueroa pa Aruba. E miembronan di Tweede Kamer Raymond de Roon y Machiel de Graaf (ambos PVV) a manda un serie di pregunta na minister Hulandes di relacionnan exterior Stef Blok riba e tema, refiriendo na un articulo den un corant Hulandes cu ta referi na e proximo consul como un baron di droga.

PREGUNTANAN

Como parti di un lista di 5 pregunta dirigi na e mandatario, e dos parlamentarionan ta cuestiona y kier contesta di e mandatario Hulandes. Entre e preguntanan, si e mandatario ta comparti e pensamento cu Hulanda por acepta solamente diplomaticonan internacional cu no tin un reputacion cuestionable. Ademas ta puntra e mandatario si e ta corda e blunder cu e predecesor di Blok a logra, ora cu el a acepta Hugo Carvajal como Consul di Venezuela na Aruba na 2014. Tambe e pregunta cu pakico e mandatario aki tambe a bay di acuerdo pa nombracion di un consul Venezolano pa Aruba cu tin un reputacion cuestionable. Ademas ta puntra si e ta mira e reputacion di Aruba y asina tambe Reino Hulandes ta keda confirma como un palanca di traficacion internacional di droga. Y finalmente, ta puntra e mandatario Hulandes si e ta disponibel pa revoca e decision aki mas lihe cu ta posibel, y e no kier hacie, pakico no. Manera custumber, ta spera cu dentro di algun siman por ricibi contesta riba esaki.