Taxistanan preocupa cu concepto Uber y ta menaza cu accion

ORANJESTAD – E hecho cu un representante di Uber (concepto di taxi priva) ta biniendo Aruba pa un conferencia tin taxistanan preocupa.   Asina nan a bisa den un conferencia di prensa diahuebs atardi. Nan kier sa exactamente kico e intencion di e hendenan aki ta. Mes momento a menaza cu un accion unda cu ta pensa pa blokia varios caminda crucial, si no haya atencion necesario. A mustra cu ta basta papia y awor mester bin accion. E biaha aki, los di varios otro asunto pendiente manera aumento di tarifa, e asunto di Uber tin nan mas preocupa.

CONFERENCIA

E taxistanan a mustra cu a compronde cu tin un conferencia na caminda pa Aruba otro siman, y cu eynan lo tin un representante di Uber cu lo duna un presentacion riba e.o. mercadeo di e concepto. Nan ta referi na e E-Conference di otro siman diasabra unda cu un di e oradornan ta e representante di e concepto di Uber (taxi priva). E taxistanan kier sa kico ta e intencion y pakico net Uber tin cu bin papia ariba. NoticiaCla a publica un articulo riba e parti di Uber cu lo ta den e conferencia proximente (otro siman diasabra).Uber ta un palabra hopi pisa pa nan, pasobra nan ta considere un menaza pa nan. A mustra cu nan ta ‘krap’ caba cu trabou pa tur e 450 taxistanan cu tin na Aruba actualmente. Tin mucho competencia entre taxista, taxi pirata, autobus, bus regular etc. Riba e asunto di Uber, a pidi pa no sigui hereda cos di afor, pasobra nan no kier cambio.

ACCION

A papia di un accion cu nan kier tene si no haya oido di gobierno riba e tema aki. Ora cu papia di accion, nan ta papia di uza grupo grandi di e 350 taxistanan pa blokea varios caminda importante na Aruba. A haci mencion di entre otro blokea caminda di aeropuerto, hotelnan y otro areanan crucial, pa asina e accion tin efecto. Pero no a bisa ki dia tin pensa di haci esaki.

CONCEPTO DI UBER

E concepto di Uber a cuminsa na San Fransisco California na maart 2009, pa Travis Kalanic y Garrett Camp. E ta un concepto similar na un taxi, pero bo ta busca bo taxi eynan via un app riba bo telefon y ta paga via e app, riba un cuenta cu bo tin habri cu Uber. E concepto a crece y e ta disponibel na 58 pais rond di mundo. Na Aruba e concepto a wordo discuti algun tempo pasa pero a nenga e concepto di haci su entrada inicialmente. E tarifa di un taxi uber, no ta necesariamente mas barata, sino mas conviniente.