Bosman ta cuestiona Knops riba cifra di Venezolanonan na Aruba

DEN HAAG – Parlamentario Hulandes Andre Bosman (VVD) ta cuestiona e hecho cu secretario di estado Hulandes pa asuntonan di Reino Raymond Knops no sa e cantidad di illegal Venezolano na islanan ABC, mientras cu comisionado di nacionnan uni pa asunto di refugiado (UNHCR) ta haci mencion di por lo menos 20.000 Venezolano a bay Aruba durante e ultimo añanan. E ta un declaracion interesante pasobra durante e eleccion presidencial Venezolano recien na Aruba, apenas algo mas cu mil Venezolano na Aruba por a vota. Basa riba e tema, a haci e mandatario Knops un serie di 8 pregunta.

DECLARACION PREMIER

E declaracionnan di prome minister di Aruba Evelyn Wever Croes na prensa Hulandes recientemente tambe ta sigui hala atencion. Primordialmente e embergadura di e contestanan duna riba e situacion na Venezuela y e relacion pa cu Aruba. Esaki tambe ta sigui intriga e politico Hulandes Bosman. Entre e 8 preguntanan manda pa Knops , Bosman a cuestiona particularmente e declaracion cu ‘Aruba ta birando un di dos Siria, a consecuencia di e influx di Venezolanonan. Un declaracion cu Wever lo a haci na e corant Hulandes NRC. Mientrastanto Wever a laga coregi su declaracionnan cu e corant NRC a saca for di contexto.

PREGUNTANAN

Entre e preguntanan, Bosman ta cuestiona si e mandatario di Aruba enberdad a haci e declaracionnan aki, esta esnan cu lo a crea conmocion, y kico e ta opina riba e tema. Ademas Bosman ta puntra Knops y puntra su opinion si e ta reconoce e cuadro pinta, esta cu Aruba ta luchando cu un situacion di exodus Venezolano y cu esaki ta aumenta e cantidad di arma y crimen riba e isla.

RECORDA

Bek pa e pregunta riba e discrepancia di cifra, Bosman ta puntra Knops si e ta corda e declaracionnan haci di e mandatario cu e no tabata na altura di e cantidad di illegal di Venezolano riba e islanan ABC. Segun Bosman, Knops no tabata sa, mientras cu e comisionado di UNHCR ta bisa cu mas of menos 20.000 Venezolano a bay Aruba ultimo añanan. Y aki e ta papia di Venezolanonan cu a establece nan mes na Aruba. Bosman kier sa si Knops a puntra e investigadornan di UNHCR con nan a yega na e cifra aki y si e ta dispuesto pa comparti e informacion aki y si e no ta dispuesto, pakico no.

WARDA COSTA

Bosman kier sa tambe si Warda Costa di Caribe ta registra cuanto boto cu indocumentado y eventual droga a wordo intercepta na e islanan ABC y si e ta dispuesto pa comparti esaki cu parlamento Hulandes (Tweede Kamer). Tambe Bosman kier sa si Knops ta reconoce e tarea importante di Warda Costa pa ‘spanta’ y ‘evita’ cu ta bin un influx aun mas grandi Venezolanonan riba e islanan.