Articulo a bira 'discusion publico' entre prome minister y NRC Handelsblad

DEN HAAG/ORANJESTAD – E articulo di e corant Hulandes NRC Handelsblad a bira un 'discusion publico' entre e corant y e prome minister di Aruba Evelyn Wever Croes. Ta trata di e articulo unda cu NRC a entrevista Wever riba e situacion di Venezuela. E contenido di e entrevista no a cay den bon tera cerca e prome mandatario. Den un reaccion pa NoticiaCla e siman aki, e mandatario a atende cu por lo menos 3 punto no ta cuadra den e entrevista y cu e la informa e corant. Interesante ta cu e corant a informa NoticiaCla tambe cu e informacion den nos raportahe, (e reaccion di e prome mandatario) no ta cuadra. Basa riba e punto aki, e prome mandatario a manda un contesta pa e corant. Awe mainta mientrastanto e corant a dicidi di emiti un remitido riba e tema y a manda esaki pa e portal aki.

PROTESTA

E corant Hulandes a informa e portal aki cu nan a entama un protesta contra Wever Croes y a informe di dje tambe. Segun e corant, e hecho cu Wever ta reclama cu a cite robez, no a cay den bon tera di e corant. Nan ta considera esey como dañino pa e corant y iresponsabel. Tambe nan ta mustra puntonan pa mustra cu debidamente nan a cita tur cos corecto. A pidi e prome minister pa rectifica e declaracionnan aki mesora y di un forma publico.

REACCION PROME MINISTER

Prome minister Wever a reacciona mesora, informando e corant cu a tuma nota di e peticion pa rectificacion. Aki un biaha mas e prome minister ta sigura e corant cu tin citadonan cu nunca e no a bisa. “Como tal mi lo no rectifica tampoco. Mi abogado lo atende cu NRC directamente” Wever a sigui bisa. Ademas e la manda un link pa e corant cu e version corecto di su declaracion, y a bisa cu e no ta bay dedica mas energia na e asunto.