Hulanda no ta revoca decision pa reconoce consul Venezolano nobo pa Aruba

DEN HAAG – E consul general nobo di Venezuela apunta pa Aruba Carlos Mata Figueroa ta keda vigente. “Mi no ta mira motibo pa revoca mi decision (pa reconoce e consul Mata Figueroa)” Stef Blok, minister Hulandes pa relacionnan Exterior a contesta dos parlamentario Hulandes Raymond de Roon y Machiel de Graaf (ambos PVV) awe. Tabata den un carta recien cu dos parlamentarionan menciona, a cuestiona e reconocemento di gobierno di Reino Hulandes pa Mata Figueroa bira e proximo consul di Venezuela na Aruba debi na supuesto lasonan criminal. Un corant Hulandes a tilda e persona te hasta di ta un baron di droga. Basa riba informacion ey, e preguntanan a keda manda na e mandatario Hulandes.

INDICACION

Segun Blok, contrario na e caso di e candidato anterior Hugo Carvajal, no tin ningun indicacion manera un sentencia di un ofensa serio. Ademas Mata Figueroa no ta aparece riba e lista “Specially Designated Nationals and Blocked Persons” di departamento di Finanza di Merca. Como tal y basa riba e contesta di e pregunta ultimo, Blok a bisa cu e no ta mira motibo pa revoca e decision pa reconoce e consul. No ta conoci ki dia e consul nobo lo cuminsa su trabou na Aruba. E tin cu haya su credencialnan na Hulanda prome, y despues por biaha pa Aruba pa cuminsa su labor como e consul general nobo di Venezuela pa Aruba. Mientrastanto e vice consul Amabél Lugo ta encarga cu e consulado Venezolano na Aruba. Lesa e carta cu contesta AKI.