WEB no ta kere cu perdemento di coriente ta sosode di mas

ORANJESTAD – Director di WEB no ta kere cu asunto di perdemento di coriente ta ‘sosodiendo di mas’. “Mi no ta kere” Luis Oduber a bisa NoticiaCla durante un conferencia di prensa e siman aki. E ta un reaccion riba declaracion di prome minister y alavez minister di energia Evelyn Wever Croes cu a bisa e mesun mainta cu e tambe ta haya cu e situacion ta fastioso. Como tal Wever a bisa cu a pidi un investigacion pa wak kico ta pasando cu e problema di coriente ‘ta birando mucho frecuente”. Oduber a repasa cu ta 3 biaha coriente a bay di e forma ey, esta 2 luna pasa cu un ‘brown out’ y dos aña pasa cu Aruba a conoce su ultimo blackout.

NO SOSODE MAS

E pensamento tambe di gobierno pa wak pa e cos aki no pasa nunca mas, tampoco ta posibel segun Oduber. Algo asina no por wordo evita segun Oduber. Loke si Oduber ta di acuerdo ta cu ultimo tempo tabatin mas ‘storing’ cu normal den e ekiponan cu ta mas bieu. Y pa cu esey ta purbando y trahando pa reemplaza cierto ekipo cu esnan nobo.

BLACKOUT

E director a splica dialuna atardi kico tur a sosode diabierna cu tabatin un blackout na Aruba pa por lo menos 4 pa 6 ora. Tin un storing cu a sosode den e boiler # 6 aunke cu tin cu identifica kico a causa e storing cu a pone e sistema cay di e forma ey. Unabez cu e investigacion ta conclui, lo por bisa mas.