Conocido ciudadano Frans Croes a cumpli 100 aña di edad!!

ORANJESTAD – E conocido ciudadano Frans Antonio Croes a cumpli e bunita edad di 100 aña diahuebs. E ta tata di entre otro e popular maestra di musica Maybelline Arends Croes y deportista Sandra Croes. Frans a celebra e dia di ayera den compania di su yiunan, nietonan y bisanieto nan hungando domino y pasando ratonan hopi alegre. Frans cu su 100 aña ta bon bon na tino, te cu e ta core auto ainda, hunga su wega di domino y toca guitara. Manera su un di su yiunan a bisa ‘papa ta full bij, full gezond!’. Frans ta stuur bay misa of supermercado ora cu e mester di algo, y cu su edad respeta, esey no ta un problema. Semper e la traha duro, y usando e lema di semper ‘keda move, pensa positivo y mas cu tur no ‘cry over spilled milk’.

Frans a cumpli 73 aña di feliz matrimonio cu su casa Aura cu aña pasa juni a fayece. Tata di 6 yiu, Maybelline, Dorinda (dfm), Sandra Dennis, Bianca y Ricky. E tin 14 nieto y 16 bisa nieto.

Frans semper ta programa su dianan pa tur cos cana bon. E cos primordial di Frans semper tabata pa lanta su yiunan cu amor y cu e lema di ‘famia ta prome’ y ‘ser honesto semper’. Frans a traha na Lago, pero tambe na gobierno durante su añanan. Despues el a cuminsa yuda su casa Aura den negoshi di beyeza, y tabata yude order producto pe. Na caminda Frans a dicidi pa cuminsa su propio negoshi di busca producto di beyeza, esta FaCroes. Riba tereno social y deporte tambe Frans ta hopi activo. Semper participando den carnaval y tambe actividadnan deportivo te unda cu curpa ta duna. Riba tereno musical, (corda cu e ta tata di Maybelline) tambe Frans tabata activo, unda cu e tabata canta 20 aña den misa, dirigi pa su yiu, y tambe toca cornetin. Despues ora cu e edad a subi mas, e no por a ‘blaas’ mas, na e edad di 70 aña el a cuminsa siña toca guitara. Pa Frans, Dios semper tabata prome y asina e la siña tur su yiunan tambe. NoticiaCla ta desea Frans hopi mas aña di bida, y felicidad mei mei di su famia!.