Atrobe intento di bende sticker falso di number di auto

ORANJESTAD – Un biaha mas parse tin intento di bende y ofrece sticker di number di auto falso na comunidad. Riba Facebook por a nota loke ta parse un intento pa bende y of ofrece un sticker riba un Facebook site di compra y benta. For di departamento di belasting, NoticiaCla a compronde cu nan a tuma nota di dje y cu nan ta ‘on top of it’, esta a tuma e pasonan necesario pa bringa esaki ‘un biaha mas’. Un biaha mas pasobra manera a cuminsa cu e relato, no ta prome biaha cu esaki ta sosode. Tabata na februari ultimo cu e departamento di impuesto a tuma nota caba di un caso asina y a haci denuncia despues. No ta conoci si ta trata di e mesun persona. Ta notable cu ta trata di persona cu ta ofrece su mes como diseñador grafico Venezolano ofreciendo sticker riba e pagina di benta.