Lo entrega keho pa falsificacion y estafa di sticker di number di auto

ORANJESTAD – Departamento di impuesto ta bay entrega keho contra personanan cu ta bendiendo sticker falso pa number di auto y ta estafando hende cu e acto aki. NoticiaCla a compronde cu riba e pagina di Facebook di Vraag en Aanbod ta haciendo e oferta di plak e sticker pa e cliente y ta cobra e cliente 100 florin pa e sticker y trabou. Pa cuminsa, e sticker no ta di e aña corecto y ta falso, y ta cobrando e cliente 100 florin pa un sticker di 6 florin.  E sticker cu ta wordo usa, no ta den e color oficial di e aña aki. A djies traha un rand fuchsia pa camufla e sticker y gaña wowo di polis. Mientras cu e no kier a duna un declaracion oficial, director di impuesto Luenne Gomez a confirma si pa NoticiaCla cu ta bay entrega keho oficial contra e caso aki y otro caso nan similar di falsificacion.