Wever: Aruba no mester di Hulanda pa paga su debe nacional

ORANJESTAD/ DEN HAAG – Aruba lo paga su debe nacional sin cu Hulanda mester inscribi nos isla pa por yuda cu e debe. Asina prome minister Evelyn Wever a contesta parlamentario Hulandes Andre Bosman (VVD) dialuna. E tema a cuminsa siman pasa ora cu Bosman a cuestiona e posibel uso di supuesto fondo extra si Aruba haya petroleo of gas den su subsuelo. Ora cu e tema a aparece riba e pagina di Facebook di NoticiaCla, e parlamentario a sigui reacciona y awe mainta prome minister tambe a reacciona y asina clarifica e asunto.

E TEMA

Tabata siman pasa ora cu un articulo a aparece den e vespertino Amigoe di Aruba riba e boramento di petroleo y a toca e tema di e fondonan cu e boramento aki por genera y con mester atende cu esaki. Riba esaki Bosman a puntra secretario di estado Hulandes Raymond Knops pa medio di un lista di 3 pregunta. NoticiaCla despues a pidi prome minister pa un reaccion riba esaki. Wever a reacciona na Noticiacla, cu un mensahe pa Bosman kico ta kico riba e tema y con Aruba ta atende cu su asuntonan. Unabez cu e noticia aki (manera tur otro noticia) a aparece riba e Facebook page di NoticiaCla, Bosman a opta pa reacciona ariba e pagina ey, bisando e.o. cu ta ‘mas cu claro cu ta na Aruba pa dicidi su entrada ey. “Pero si e entradanan aki no ta wordo uza pa reduccion di e debe, pakico Hulanda si mester contribui na reduccion di e debe door di inscribi riba e prestamo di Aruba. Esey no ta parcemi necesario” Bosman a comenta.

REACCION WEVER Wever a tuma nota di e reaccion ey riba e pagina di Facebook y den un paso inusual pero interesante, a dicidi di contesta Bosman riba Facebook. “Andre, ningun hende a pidi Hulanda pa inscribi riba nos debe. Nos no ta conta cu esaki!” Wever a cuminsa na bisa. E la manda Bosman pa lesa e FEM (Financieel Economisch Memorandum). “Nos por y lo paga e debe nacional nos mes sin inscripcion di Hulanda” Wever a finalisa bisando. Riba esey, Bosman tabata corto cu su reaccion “Esey ta parcemi un punto di salida excelente. Contento pa tende!” Bosman a finaliza bisando.