Wever: Aruba mes ta dicidi destinacion di entrada di boramento petroleo

ORANJESTAD/DEN HAAG- “Si en caso resulta cu tin entrada cu por wordo genera for di e boramento pa e.o. gas of petroleo, nos lo cuminsa un discusion nacional kico tin cu haci cu e entradanan aki”. Asina prome minister Evelyn Wever Croes a bisa NoticiaCla. E ta referi na e reaccion di parlamentario Hulandes Andre Bosman, cu a sugeri kico Aruba tin cu haci cu e placa ‘nobo’ aki. “Nos mester pone tur hende na su lugar. Sr Bosman por dicidi kico su gobierno ta haci aya na Hulanda” Wever a bisa. “Aki na Aruba, pueblo di Aruba ta dicidi” e prome mandatario a sigui bisa.

BOSMAN

Tabata e siman aki ainda cu parlamentario Hulandes pa VVD Andre Bosman a toca e topico aki. Si Aruba haya gas of petroleo den su subsuelo, e placa cu keda genera, mester wordo uza pa paga debe pendiente. Asina parlamentario Hulandes pa VVD (gobierno na mando na Hulanda) esta Andre Bosman ta pensa. E ta relaciona su informacion basa riba informacion di kico Aruba lo mester haci cu e placa. Un discusion cu tabata den prensa recientemente na Aruba. E parlamentario a manda un serie di pregunta pa e secretario di estado Hulandes Raymond Knops riba e tema, basa riba un articulo cu a keda publica den Amigoe. Wever den e caso aki a toca e tema mesora cu Knops pa puntre si e por contribui cu e contesta aki, ya cu ta trata un topico di Aruba.

POSIBILIDADNAN

Segun Wever, el a mustra cu semper a bisa cu si en caso resulta cu tin entrada cu por wordo genera di e boramento, (lo haya e contesta aki dentro di un aña despues cu e proefboring cuminsa aki dos luna), lo determina despues. Tin paisnan cu a laga e entradanan ki drenta sin mas. Pero den e caso ey e suma ta ‘verdamp’, pues ta usa e entradanan aki pa cubri cualkier gasto. Na final bo no sa mes pa kico tur e sumanan extra a bay. Tin otro paisnan cu ta separa e entradanan aki y ta crea un fondo pa despues dicidi con pa usa esaki como un comunidad. A duna ehempel di enseñansa, economia y innovacion. Esaki ta unda cu bo tin mester ora cu bo ta bay den un direccion di un industria cu ta bay explora gas.

KEN TA DICIDI

Wever a bisa cu siguranza cu na Aruba ta nos ta dicidi y no Hulanda. Pero mes momento e mandatario a admiti cu no a ni yega e fase aki ainda y como tal e ta kere cu si ta cuminsa aworaki bisando unda e placa tin cu bay no ta corecto. “Shonnan, ban warda wak si nos ta haya placa di e cos aki prome, anto despues hunto nos ta bay papia wak unda nos kier hiba nos pais” Wever a sigui bisa.