Parlamentario ta desmenti di a laga periodista drenta Parlamento

ORANJESTAD – Lider di fraccion di partido MEP Rocco Tjon a desmenti cu e ta esun cu e laga e periodista Nelson “Speed” Andrade drenta Parlamento. Esaki despues cu ayera den corte, abogado di e periodista a menciona nomber di e parlamentario como e persona cu a laga e periodista drenta. “A wordo bisa cu ami a laga sr Andrade drenta Parlamento y esey absolutamente no ta berdad” Tjon a bisa. “Mi kier rectifica esey mesora, pa no crea un polemica innecesario pa no laga e cos aki leid su mesun bida, pasobra ami bou niun momento a laga sr Andrade drenta Parlamento, ni a duna instruccion na niun hende pa habri porta pa sr Andrade” Tjon a bisa. A mustra cu partido MEP semper ta habri pa prensa y ta haya diferente peticion pa entrevista. “Pero e caso specifico ta un message mi a haya di sr Andrade, bisando mi cu e ta den sala di Parlamento. Y e ora mi a cana bin ariba pa wak kico ta pasando. Pues niun momento mi a habri porta pa sr Andrade”.

E CASO

Tabata un dia prome cu den corte ora cu a trata e caso cu e periodista a entama contra e presidente di Parlamento Ady Thijsen, cu dado momento e abogado di e periodista a haci mencion di e nomber di e parlamentario, cu ta e ta esun cu a laga e periodista drenta. E caso tabata pa huez determina si e decision di prohibi e periodista drenta Parlamento pa 3 luna sigui, ta valido of no. Huez na final di e caso, a informa cu den curso di awe diaranzon, e lo dicta sentencia.