Corte a debati prohibicion contra periodista pa drenta Parlamento

Corte a debati prohibicion contra periodista pa drenta Parlamento

Posted on 12/19/2017 6:19 pm AST | Updated on 12/19/2017 6:21 pm AST

ORANJESTAD – Bou di un interes grandi entre e.o. prensa y abogadonan, e caso cu un periodista a entama contra presidente di Parlamento diamars a tuma lugar. E base di e caso tabata pa ‘identifica e motivacion di e presidente di Parlamento pa a prohibi un periodista entrada den Parlamento pa un periodo specifico’. Un contesta cu despues di basta insistencia di e huez cu a trata e caso, a bin resulta di ta ‘menaza contra e presidente y palabranan pa insulta e instituto’. Huez na final a cuestiona e motivacion ey y a bisa mesora cu den curso di dia mayan diaranzon lo dicta sentencia riba e caso.

ACUSACION

Abogado pa e periodista en cuestion, Nelson “Speed”Andrade esta mr David Kock a cuminsa na uza e angulo di libertad di prensa y di expresion pa mustra cu ora cu trata un tema asina, e ta algo hopi delicado y peligroso si no atende corectamente. E caso ta trata e hecho cu presidente di Parlamento a prohibi e periodista en cuestion entrada den e edificio di Parlamento pa un periodo di 3 luna. Declaracionan haci pa e periodista den direccion di e presidente di Parlamento a resulta e motibo di e sancion mientras e hecho cu prome cu esey, e mesun periodista a drenta e edificio danki na ayudo (segun abogado Kock ) di un parlamentario di e mesun partido di Thijsen (den e caso aki a haci mencion di e parlamentario Rocco Tjon), sinta riba e stul di Thijsen y haci un raportahe, no tabata e problema mes. Kock a splica cu mientras cu e no tin problema cu ta impone regla pa un instituto manera Parlamento, e sancion duna mester cuadra si cu e acto cometi. ‘E razon pa cual a impone e sancion aki’ tabata e pregunta cardinal di e abogado. E abogado a sigui pa menciona un lista di inconsistencia cu e presidente di Parlamento Ady Thijsen a usa pa yega na su decisionnan, cu ta pone su decision no mucho cla y corecto. Como tal Kock ta considera e castigo contra su cliente como incorecto. Como tal e presidente, segun Kock, mester a busca un otro forma. E hecho cu Thijsen a opta pa sanciona cliente di Kock basa riba declaracionnan haci pafo di Parlamento, y cu ningun momento tabata amenasante, ta cuestionable pa cual e sancion no ta na su lugar.

THIJSEN

Abogado pa Thijsen, mr Nancy Gravenstijn a cuminsa na desmenti tur acusacion y disputa fuertemente (met klem) di e contra partido contra su cliente. Mientras cu Kock ta papia di introduccion di reglanan nobo di Parlamento, Gravenstein a sigura cu ta trata di reglanan existente cu a wordo uza pa recorda tanto e periodista en cuestion como tur otro periodista kico ta e maneho di Parlamento. E abogado a uza tambe un testimonio di un agente di seguridad cu ta maneha entrada di e edificio, splicando cu e agente ta sigura cu ningun momento el a duna e periodista en cuestion e permiso pa drenta Parlamento. Pues esaki a pone e abogado pensa cu e periodista lo a uza un entrada di patras, otro di esun principal. E direccion unda a adresa e carta tambe tabata den disputa. Segun Gravenstein, ningun momento su cliente a dirigi e carta(nan) na e periodista a titr’e personal, sino na su doño di trabou, den e caso aki e portal 24ora.com. Y e prome carta no a haci mencion ningun momento di puntonan cu ta atacha libertad di prensa. Ta e declaracionnan na radio despues, ta loke a afecta Thijsen (cliente di Gravenstein), unda cu lo a declara den un forma menasante cu e periodista lo drenta e edificio ki ora cu ta y con cu ta y cu no por bise nada. “E libertad (di prensa) no mag ta mucho grandi” Gravenstein a bisa. E sancion impone segun e abogado, ta na su lugar y mester establece cu cualkier lugar cu ta respeta su mes mester tin regla. Y esnan cu kier bay e lugar, mester tene nan mes na dje. Ademas, pa loke ta e expresionnan, no por ta asina cu un hende por haci declaracionnan asina sin mas.

HUEZ

Huez den e caso aki interveni na varios momento, y cuestiona varios punto durante e caso. Entre esun cu mas el a insisti ariba y cu dado momento a bira un debate entre e huez, e abogado y Thijsen, tabata pa saca afo e motibo real pakico Thijsen a sanciona e periodista (cu prohibicion di entrada den Parlamento). Mientras cu e ta compronde cu tin regla y cu a hacie pasobra e periodista a haci e declaracionnan, e huez a sigui insisti tanto na Thijsen y e abogado, e tabata mas interesa den e base cu Thijsen a basa sum mes ariba y ‘dune e autoridad’ pa a uza e sancion di prohibicion di entrada contra e periodista. Finalmente Thijsen informa huez, cu ta e contenido di e loke cu e periodista a bisa na radio, ta e loke a molestie y pa cual Thijsen a sintie e.o. intimida y a considere menaza y falta di respet pa e instituto. Huez a cuestiona e pensamento aki, bisando Thijsen dado momento: “Bo ta considera esey un menaza?”, indicando cu e huez no ta wak nada malo cu e expresion haci. Ademas huez a cuestiona e hecho cu ta haci como si fuera cu e cartanan manda, tabata pa e portal y no 24ora. “Nos tur sa cu boso ta menciona 24ora, pero nos tur sa cu boso kier men Andrade” huez a bisa dado momento. Huez na final a bisa cu e ta dicta sentencia su manise mes, esta diaranzon aunke no por a garantia un ora. “E lo ta prome cu corte cera si” e huez a finaliza bisando.

  • Manera anticipa pa Noticiacla: Ex minister Besaril a recobra su libertad

    Manera anticipa pa Noticiacla: Ex minister Besaril a recobra su libertad

    ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes. 

  • Ex minister Besaril por recobra su libertad diabierna

    Ex minister Besaril por recobra su libertad diabierna

    ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan. 

  • Corte: Radioemisoranan mester paga DUCAPRO pa toca musica, y lo dicidi tarifa den dos luna

    Corte: Radioemisoranan mester paga DUCAPRO pa toca musica, y lo dicidi tarifa den dos luna

    ORANJESTAD – Radioemisoranan na Aruba mester paga pa por toca musica di artistanan. Esey ta un hecho!. Loke mester wordo determina ainda, ta e tarifa cu e fundacion DUCAPRO por cobra. Asina e huez cu a trata e caso sumario diabierna mainta den corte cu DUCAPRO a cuminsa contra di Q-Waves NV, conoci comercialmente como HITs 100FM, di e propietario Aldrich Croes. DUCAPRO a cuminsa e caso pasobra e radio lo no kier paga e suma mensual cu ta rekeri pa e paga pa haya derecho pa toca musica tur luna.  E propietario di e radio a sigura cu no ta cu nan no kier paga, sino cu nan tin problema cu e suma/tarifa. 

  • Ex minister Besaril ta keda encarcela pa 16 dia mas!

    Ex minister Besaril ta keda encarcela pa 16 dia mas!

    ORANJESTAD – Ex minister Guilfred Besaril su detencion awe merdia a keda prolonga cu 2 biaha 8 dia. Esaki kier men cu despues cu e la sinta su prome 8 dianan, huez comisario a haya ta necesario pa prolonga esaki un biaha mas, debi cu mas probable, no ta cla cu sea e interogacion of cu e investigacion, cu ta rekeri su detencion. Esaki pa evita cu e lo por influencia e loke ta investiga aworaki. E la keda deteni dia 13 di februari ultimo, relaciona cu e caso Tulipan unda cu ta acuse di corupcion y abuso di poder como minister tempo cu e tabata minister plenipotenciario na Hulanda. Despues dia 16 di februari a prolonga e detencion cu 8 dia mas. Awe, manera noticiacla a raporta anteriormente, e HC mester a dicidi si ta prolonga esaki. Y esey a sosode tambe. 

  • Awe ta dicidi si ta prolonga detencion di ex minister Besaril cu 8 dia mas

    Awe ta dicidi si ta prolonga detencion di ex minister Besaril cu 8 dia mas

    ORANJESTAD - Ex minister Guilfred Besaril ta ketobay deteni, y awe ta finalisa e 8 dia detencion conforme e proceso di detencion. E prome dos dianan siman pasa tabata den asina yama ‘in verzekering’, y despues a prolonga e detencion cu 8 dia mas. E 8 dianan aki ta vence awe, y e huez comisario tin cu dicidi si ta prolonga e detencion aki cu 8 dia mas of ta manda e persona cas, te ora cu su caso (Tulipan) keda presenta. Por ta cu ta dicidi cu mester mas tempo pa cual por prolonga e detencion cu 8 dia mas. Y si aun mester mas tempo, por prolongue cu 8 dia mas. Despues si mester prolonga atrobe, esaki ta bira 60 dia mas. Si awe ora cu e keda presenta dilanti e huez comisario, dicidi cu ta prolonga e detencion, esaki no kier men necesariamente si cu e tin cu keda (manera tabata e caso e siman aki) e 8 dianan completo deteni. E ex minister ta wordo acusa di entre otro corupcion y abuso di su poder tempo cu e tabata minister plenipotenciario na Hulanda durante e ultimo dos periodonan di Gabinete Wever Croes I y parti di II.

  • 'Caribisacion' di nos magistratura: Di 11 hues actual na Aruba, 6 tin pasado local

    'Caribisacion' di nos magistratura: Di 11 hues actual na Aruba, 6 tin pasado local

    ORANJESTAD - Di 11 hues trahando den Corte, 6 tin pasado local cu ta traha na e sede aki. Asina presidente di Corte Comun, mr Mauritsz de Kort a bisa recientemente durante instalacion di dos huez. “Cu esaki mi a yega bek riba e valor di e 'Caribisacion' di nos magistratura” de Kort a sigui bisa. Pasobra, segun de Kort, pa Caribisacion, nos mester di huesnan y otro mandatarionan cu tin raiz riba nos islanan. Aruba mag ta orguyoso di e hecho cu di e 11 hues cu ta traha na e sede aki di Corte, 6 tin un pasado local. Y di 3 di nan, Universidad di Aruba ta nan alma mater. Esaki ta un logro maraviyoso pa un isla chikito y ambicioso. “Pero mi tambe ta mencionele pa nos keda vigila. Dushi Aruba, no perde e edge aki! “

  • Powered by SETAR