Caso Insel Air: Aruba ta para firme cu Surnam tin cu actua awor

ORANJESTAD – Mientras cu e menasa di paro di buelonan di Surinam Airways pa y for di Aruba ta keda vigente, e bala ta den tereno di Surnam pa sigui regla e asunto di permiso pa Insel Air Aruba, y no contrario manera autoridad aereo di Surnam a declara via prensa ( lesa e articulo di referencia aki ). Minister di Transporte di Aruba, Otmar Oduber a confirma esaki na NoticiaCla.com diadomingo atardi. Oduber a coregi tambe e declaracion di consehero surnameno di aviacion, Gerard Bruning cu a bisa cu lo tin comunicacion continuo cu Direccion di Aviacion Civil. Esaki no ta berdad segun Oduber, bisando cu ta apenas 2 biaha a comunica cu Casas (Civil Aviation Safety Authority Suriname) riba e asunto di Insel Air. Mientrastanto e mandatario ta mantene su ultimatum di diaranson proximo cu Surnam tin pa duna Aruba un contesta formal riba e situacion di Insel Air Aruba.

E mandatario a confirma cu e la tuma nota di e declaracionnan di e consehero presidencial di Surnam Gerard Bruning, (cu Oduber a bisa di no ta conoce) riba e caso di ultimatum di diaranson awor, pero oficialmente te cu diadomingo no a tende nada ainda. E ta spera cu Surnam cumpli cu e ultimatum, sino tin cu cuminsa e proceso pa para buelonan di Surinam Airways pa bula pa y for di Aruba. Algo cu e ta lamenta pasobra los di e problema aki, Surinam Airways no tin nada di haber cu e problema. Segun Oduber, e aerolinea ta un bon partner di Aruba y semper a ricibi bon cooperacion. Pero no por ta asina cu gobierno no tin e respet pa trata e compania di Aruba cu mesun respet. Y ey e problema ta. Mientras cu Oduber no kier tuma e paso aki, e ta uno necesario.

Riba e pregunta cu si unabes e proceso di para buelonan di Surinam Airways cuminsa, (e proceso segun tratado ta dura 6 luna), cu si durante e periodo aki bin cambio di postura di Surnam, si por para e proceso di paro, Oduber no por a contesta. E la bisa solamente cu e ta spera cu Surnam lo sa di actua corecto y contesta den e tempo cu e tin, y cu e lo sa di cumpli y haci lo corecto den e periodo stipula. E tratado pues ta stipula claramente cu no por para un compania den forma abrupto, sino cu tin cu duna un periodo pa haci esaki.

Pa loke ta e reaccion di Surnam cu ta na Insel Air pa procesa su cosnan na tempo, Oduber a coregi esaki bisando cu ta keda na Surnam pa e proximo paso prome cu Insel Air por continua cu su peticionnan necesario. Pues segun Oduber, no ta manera cu Bruning ta bisa, cu ta Insel Air ta esun cu ta tardando e proceso. E declaracion anterior di Bruning, cu Insel Air mester lanta un compania apart na Aruba, pa por cuminsa opera, tambe no tin sentido segun Oduber pasobra esey ta haci pa mas di 3 pa 4 anja pasa caba. Algo cu e CEO di Insel Air Aruba, Frederick Nuboer tambe a confirma na NoticiaCla.com algun tempo pasa.

Den un combersacion diasabra ultimo cu Nuboer diasabra, e tambe a confirma declaracion di minister di Transporte Oduber, cu e bala ta den tereno di Surnam, y no Insel Air. “Loke cu Bruning (cu ademas di ta presidente comisario di SLM fuera di consehero presidencial di aviacion) tin cu haci ta conseha e minister di transporte pa duna Insel Air Aruba su ‘permiso di aterisahe’. Algo cu Casas tambe a bisa” Nuboer a sigura NoticiaCla.com. Ta ora cu esey sosode, Insel Air Aruba por continua cu su tramite. Nuboer kier pa Surnam duna e permiso di aterisahe, y no tarda e asunto mas. Nuboer a referi na un carta fecha 11 di july di e aña aki unda cu claramente ta mustra cu Surnam tin cu otorga un permiso di aterisahe, prome cu Insel Air por cuminsa cu su proceso (lesa e fragmento di e carta aki) . “Y te ainda nos no a ricibi esey” Nuboer a sigura NoticiaCla.com diasabra. Ta trata di un carta cu ta splica Insel Air kico tur mester pa por keda cla. Y ta splica Insel Air cu mester  cumpli cu por lo menos 8 pa 10 documento, despues cu Surnam otorga Insel Air Aruba e permiso di aterisahe. No prome. Algo cu segun tanto Nuboer como Oduber, no a sosode ainda. Pues, segun tanto Nuboer como Oduber, e bala, ta den tereno di Surnam pa soluciona e asunto aki.