Gobierno di Surnam ta reacciona riba ultimatum di Aruba

PARAMARIBO – “Mi no ta kere cu e minister di Aruba lo por a bisa algo imposibel asina, pasobra segun e tratado, no por para buelonan di SLM den un forma abrupto. Ta stipula hopi cla den cuanto tempo esaki mester sosode” consehero presidencial riba sector di aviacion di Surnam, Gerard Bruning a bisa diasabra na Surnam. “Di otro banda, nos ta den contacto continuo cu autoridad di aviacion di Aruba” Bruning ta subraya.

Brunning a reacciona diasabra den e corant surnamenjo ‘de Ware Tijd’ riba e primicia di NoticiaCla.com unda cu minister di transporte di Aruba Otmar Oduber ta menasa cu un ultimatum pa autoridad di Surnam. Den e articulo di NoticiaCla.com, Oduber ta duna gobierno di Surnam 5 dia tempo pa reacciona riba e problema di Insel Air.

Segun Bruning, tin solamente un formalidad pa resolve e conflicto entre e compania di Corsou Insel Air y autoridad di aviacion surnamenjo. Ademas Bruning ta bisa cu e bala ta den corte di Insel Air Aruba. Brian deSouza, hefe suplente di Casas (Civil Aviation Safety Authority Suriname) a confirma cu e aerolinja (Insel Air Aruba) no a completa su formalidadnan na Surnam. “Surnam lo no para den caminda pa e plannan di Insel Air pa conecta Aruba directo cu Surnam. Pero e tin cu sigui e procedura cu ta valido tur caminda rond mundo”.

Tabata diahuebs ultimo cu minister di transporte di Aruba, Otmar Oduber den forma di primicia a informa NoticiaCla.com cu gobierno di Surnam tin 5 dia pa reacciona riba e situacion di Insel Air Aruba, sino gobierno di Aruba lo prohibi buelonan di Surinam Airways pa bula pa Aruba y for di Aruba den un periodo di 6 luna. Oduber a confirma cu un siman despues cu e la manda un carta pa su homologo di transporte Falisi Pinas, e no a haya reaccion for di dje pa e asunto di Insel Air Aruba su problema di bula pa Surnam.

Segun e mandatario, mirando cu ta bay bira 2 luna cu e compania local cu tin un permiso local y a haci un peticion legal pa bula entre Aruba y Surnam pa bula a base di e acuerdo di open sky policy, e la pidi e atencion na Pinas, pa por ricibi e reaccion aki. E carta aki Oduber a manda un siman pasa diahuebs, cu un tinte di urgencia. Segun Oduber, e la ricibi confirmacion cu Surnam a ricibi e carta, pero te cu diahuebs e no a ricibi ningun reaccion ainda.

Como tal a tuma pues e decision cu diabierna ta sali un carta cu ultimatum pa cumpli cu un contesta. “Mirando cu no ta respetando e acuerdo cu tin entre Aruba y Surnam, mientras cu nos si a cumpli na tur momento cu awe Surinam Airways por opera usando e derecho di 5o libertad, cu si pa otro siman diaranson no ricibi un reaccion di parti di autoridad di Surnam, cu lo pone un paro na e acuerdo di e aerolinea di Surnam. Esaki ta nifica cu desde e momento cu e notificacion drenta, cu den un periodo di 6 luna e operacion lo yega na un fin pa loke ta trata e aerolinea cu ta bula cu e AOC di Surnam” Oduber a confirma na NoticiaCla.com.