Famia minister Paul Croes ta reacciona riba declaracion abogado Lejuez

ORANJESTAD – “ Sr. Chris Lejuez no ta abogado di Sr Paul Croes y e mester sa bon cu e no por duna ningun declaracion riba ni rond e caso di nos ruman Paul Croes”. Asina famia di Paul Croes a declara den un comunicado awe merdia. E reaccion ta basa riba un declaracion haci di Lejuez riba NoticiaCla awe mainta. E declaracion unda cu entre otro Lejuez ta papia riba puntonan di e caso di e mandatario, no a cay den bon tera cerca e famia, y a hala hopi atencion, no solamente cerca e famia pero tambe otro circulonan. El a bira practicamente e topico di dia. “Nos ta considera su reaccion contra tur etica y contra ley y nos tin pensa di pidi abogado di Sr Croes, esta Sra Vaders pa puntra fiscal kico esaki ta?”, e comunicado di famia a sigui bisa.

DEFENSA

E famia a sigui bisa cu nan ta pensa cu Lejuez mester percura defende su cliente (nan) that’s it y no comenta cos cu por bruha tera y purba influencia opinion popular asina ey. “ Fout y contra tur regla y etica esey e ta nada mas. Ta parse cu sr Lejuez kier sinta den stoel di fiscal of huez y kier trece e caso den un luz negativo contra e Minister”.

POLITICA

Segun e famia, e asunto ta uno politico. “ No ta basta cu ta duna opositornan 5 luna pa lastra nos ruman, susha su imagen na nan antoho, tortura su persona y su famia,  pa un conocedor di ley, hasi cierto declaracion pa prensa. E ta pone nos pensa atrobe riba influencia politico di e caso, mirando cu Chris su sobrina Lejuez ta riba lista di Mep. Mira con leu politica ta yega”.

INOCENCIA

E famia ta finaliza bisando cu nan ta keda para riba nan punto. “ Dilanti Huez su abogado lo sa di demostra inocencia di Minister Paul Croes di tur e falsedad y sushedad den su contra. Lejuez mester hasi su trabou y yuda su clientenan cu e ta representa y no hunga politiek di e forma baho aki”. Te aki e reaccion di e famia di minister Paul Croes riba e articulo cu a sali awe riba e portal aki.