• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Lejuez: Informacion riba mesa ta incrimina Paul Croes

ORANJESTAD - Desde cu minister Paul Croes a keda deteni siman pasa, e pregunta den comunidad ta kico realmente a sosode y si enberdad Croes ta culpabel di loke e ta wordo sospecha di dje. Sigur si tende su version algun tempo atras, unda cu e ta desmenti tur posibel acusacion y ta sigura cu e 'lo sali liber di tur cos'. Ademas mas recien durante un evento unda cu Croes a 'endorse' dos colega di partido, un di nan, actual minister Mike de Meza a hura cu tur e loke cu tin contra Croes, ta un mentira y cu e ta sostene 100% y lo sigui ripiti esaki. 

LEJUEZ

NoticiaCla mientrastanto a logra haya declaracionan di un di e abogadonan envolvi, cu tabata dispuesto  pa contesta pregunta di NoticiaCla en cuanto e caso. Den e caso aki ta trata di abogado Chris Lejuez. Ta mustra cu e loke cu Croes a declara te cu awor, no ta berdad y cu tin informacion riba mesa cu ta incrimina Croes pa loke e ta wordo acusa di dje. Abogado Lejuez a splica NoticiaCla cu tin varios cliente cu el a representa y ta representa ainda. Un di nan a bay liber recientemente. Mientras cu e no a papia di su clientenan directamente, el a tene e informacion cu tin, en general. Pa proteccion, e no a menciona kenda nan tur ta e clientenan cu e tin den e caso, pero nan ta varios persona y tin den nan cu ta conoci. 

STRAFDOSSIER

Segun Lejuez, loke e por bisa ta cu tin material den e ‘strafdossier’ di e caso Ibis, cu ta indica entre otro cu 'tin hende cu a incrimina nan mes, pues a acepta nan propio culpabilidad, declarando cu nan a paga Paul pa haya ontheffing'. Declaracionan serio cu e abogado particular a bin dilanti cu ne cu ta mustra cu e imagen cu tin di Croes, no ta esun corecto. Tin sospechoso cu ta considera cu esaki no ta husto. Segun e personanan aki si familiares y hasta coleganan di partido sa e berdad, loke tin riba Croes, nan lo no ta defendiendo e cu ''alma y cuerpo'. "Nan sa tambe, segun material den e strafdossier, cuanto placa nan a duna y pa cual ontheffing e tabata, cu nomber y fam". E abogado a sigura cu tin hopi nomber y hopi hende cu a wordo scucha. E problema den e caso aki ta cu mester por prueba henter un 'proceso di ontheffing', esta for di comienso di e proceso te na final. Pues no solamente si un persona declara cu e la duna placa pa logra un ontheffing, sino ken a ricibi e placa, cuanto  placa, pa cual ontheffing, cu e ontheffing a tuma lugar di berdad, etc. Dus e informacion asina mester ta completo pa e por ta valido. 

BEPERKING

E motibo cu Lejuez a opta pa contesta pregunta awor y cu ta pone cu e por duna contesta awor, ta pasobra a kita tur 'beperking', esta e prohibicion di papia cu tabata imponi riba tur su clientenan. Esey ta pone cu e por trece cierto informacion dilanti cu sospechosonan ta pasando aden y cu e por papia ariba dje. Mientras cu e abogado no a bay den detayes, a mustra si cu el a sinta den practicamente tur e combersacionan, y ta hopi informacion a bin dilanti, cu ta pinta un otro situacion di cu Croes a splica. E no ta contra Croes, pero simplemente mester evita cu ta pintando un imagen negativo di e otro sospechosonan, mientras cu den e caso Ibis no ta na su lugar pa haci como si fuera cu Croes no a haci nada, sigur no si mira kico tur OM tin na material contra dje. Un di su clientenan ta e persona Capriles, pero tin mas personanan den e caso aki cu e ta representa. Algun di nan ta liber awe.

CULPABILIDAD 

 "Tin declaracionan cu ta punta directamente riba Paul, cu Paul a haya placa. Cu e placa a wordo paga en persona, na dje. Tin informacion cu e mes a laga sa cuanto e placa mester ta" Lejuez a sigui bisa. "Tin informacion na ken e la laga sa. Tin informacion pa cual ontheffing e mester tabata". Y cos no ta para aki. "Tin informacion den e strafdossier cu ta bisa cuanto e suma (di ontheffing) tabata. Generalmente ta 2.500 florin pa su firma. Y tin cu ta mas. E minister a yuda hopi hende tambe sin cobra nan nada, djies pa yuda nan di bon curason. No ta asina cu el a cobra pa tur vergunning. Pero si tin bastante placa riba mesa". E hecho cu e abogado tabata dispuesto pa contesta pregunta aworaki tin motibo. "Mi ta haya cu e publico merece di haya informacion corecto pa evita speculacion cu no ta cuadra cu berdad. Mi no ta haya cu ta na su lugar, cu aworaki bo ta kima hopi hende cu semper a yudabo y sostenebo." Lejuez a sigui bisa.  Si ta trata di 2000 ontheffing, Lejuez no por bisa, pero ta hopi y sigur riba 1000 segun ela compronde. E loke ta wordo bisa, cu ta Hulanda ta tras di e asunto aki, y cu ta (gobierno di) Hulanda y partidonan di oposicion na Aruba ta fabricando informacion falso pa logra incrimina Croes, segun Lejuez no ta corecto. "Esey no ta berdad. E impresion ey ta eroneo y no ta na su lugar! 

INVESTIGACION

Definitivamente tin cosnan y cu nan (OM), ta haciendo un investigacion. Y e sa, pasobra e tin clientenan cu ta envolvi y cu a wordo interoga di cual algun a wordo deteni y otronan cu a simplemente wordo interoga. E declaracion aki di Lejuez, ta pa meramente evita cu tin hendenan cu ta simpatise, cu kier para su tras, sea ta sostenedornan, famia of otronan cu ta para su tras, sa kico ta pasando. Pasobra si resulta cu e informacion of imagen no ta corecto, Croes lo a 'defrauda' nan tur. "Ta como si fuera el a traiciona nan. Y esey ami ta haya cu ta pasando rond di dje. Si bo tabata sa kico tin y ta pasando, posiblemente bo lo no a sostene asina, brase, saca potret cune den corant etc". Mes momento e abogado no ta huzga esnan cu ta sostene, pasobra un persona amigo of familiar lo sostene su amigo of famia den bon y den malo.