Ruta Aruba-Surnam di Insel Air cuestiona na Hulanda

DEN HAAG – Miembro di Tweede Kamer Farshad Bashir di Socialistische Partij (SP) ta cuestiona e maneho di ‘open sky policy’ entre Surnam, Hulanda Aruba y Corsou. Den un lista di pregunta na gobierno Hulandes, Bashir ta haci un serie di pregunta, basa riba e articulo di e corant surnamenjo de Ware Tijd di 23 di augustus ultimo. Den e articulo ey, (cu NoticiaCla.com tambe a publica), e consehero di presidente Desi Bouterse riba tereno di aviacion, Gerard Brunings ta laga sa cu Hulanda a bisa cu e no tin interes pa un open sky completo cu Surnam.

Brunings, a base di e ponencia aki, ta cuestiona cu Corsou de hecho, ta autorisa pa negosha un acuerdo di Open Sky Policy cu Surnam. E parlamentario hulandes mientrastanto, esta Bashir, kier un reaccion completo di Minister di Relacionnan Exterior Frans Timmermans y e secretario di estado riba infrastructura riba e tereno aki.

Ademas departamento di relacionnan exterior mester indica si ta cuadra cu aña pasa nan a laga sa na Surnam cu no tin e interes aki pa regla e open sky policy completo. “Con por ta cu a bin un bruhamento riba e asunto di open sky policy, mientras cu den contesta anterior di parlamento hulandes, bo ta indica cu e acuerdo actual entre Surnam y Hulanda tin un caracter hopi habri? Bashir ta puntra.

Bashir kier sa tambe si ta berdad cu e tratado actual di aviacion pa buelonan entre Schiphol y Zanderij no ta brinda espacio pa companianan aereo pafo di e dos paisnan ey, pa conecta Schiphol directamente cu Paramaribo. Tambe e parlamentario kier sa si actualmente no tin barera door di e acuerdo actual di aviacion, cu ta pone cu Insel air no por bula directamente entre Aruba y Surnam. Y tambe si Corsou ta autorisa pa independientemente   sera acuerdo cu otro paisnan referente transporte aereo. “ Bo tin problema si Surnam sera un acuerdo di open sky cu Antiyas” Bashir ta puntra finalmente.

E asunto aki tin varios simannan caba ta andando entre Corsou, Aruba y Surnam y a cuminsa ora cu Insel Air Aruba kier a inicia su buelo directo entre Aruba y Surnam. Na e occasion aki, Insel Air Aruba a haya sa cu no ta permiti. Despues di algun bay bin, a dicidi cu ta bula e ruta aki toch, y cu acuerdonan lo tabata ok y den tratamento. Ora cu a manda e siguiente buelo, e capitan mes a dicidi di bira e avion bek pa Corsou ora cu e capitan a haya informacion cu e lo tabatin chens di wordo manda bek si e yega Surnam. For di e tempo ey, tin un discusion andando entre e tres paisnan aki, pa cu e derecho di bulamento.