Surnam ta papia di ‘solucion’ pa conflicto ruta Insel Air Aruba

PARAMARIBO – Tin un solucion pa problema rond di e ruta Aruba-Surnam di e compania aereo Insel Air. Por lo menos segun autoridad surnamenjo a raporta dialuna den corant di e pais, esta de Ware Tijd (lesa e articulo aki) . Segun e corant, e compania basa na Corsou, lo ‘lanta un compania nobo na Aruba’ y lo uza e acuerdonan aereo cu tin entre Aruba y Surnam. NoticiaCla.com a tuma contacto cu e persona responsabel pa e declaracion ey, esta Gerard Bruning, pero no a haya contesta ainda. Bruning ta e consehero presidencial riba aviacion na Surnam. E declaracion aki no ta cuadra mirando e hecho cu ya caba Insel Air Aruba ta existi te cu e tin un licencia pa biaha. E CEO di Insel Air Aruba Frederick Nuboer tampoco ta compronde e declaracion aki, pero a referi NoticiaCla.com pa papia cu e persona aki mes, y haya sa kico e kier men cu e declaracion aki.

“Insel Air ta reglando e documentacion aworaki, y ta e speransa cu pronto lo por tin un coneccion aereo directo entre Oranjestad y Zanderij”, Bruning ta sigui bisa. E articulo den e corant surnamenjo de Ware Tijd, ta sigui bisa cu e aerolinea (Insel Air) lo a confundi cu e ruta Aruba-Surnam lo por a wordo manteni a base di acuerdonan existente entre Surnam y Corsou y Aruba. “Como tal nan a faya pa regla e proceso na tempo”. Consecuencia ta cu for di augustus, e aerolinja ta operando e buelo cu un stop na Corsou, envez di un buelo directo.