De Meza: Trahadonan Serlimar no ta perde nan trabou

ORANJESTAD – Trahadonan di Serlimar no ta bay perde nan trabou, y no ta cera Serlimar sino mas bien ta 'adapta' e operacion. Asina e trahadonan di e compania a bin tende di parti di e sindicato SEPPA despues di nan reunion cu e mandatarionan Minister Mike de Meza hunto cu su colega Minister Benny Sevinger. Nan a reuni cu representante di trahadonan di SERLIMAR dialuna mainta, despues cu e trahadonan di e compania a bay den accion pa algun ora. Cu e terminacion di e reunion, e accion a termina tambe e ora ey. 

REUNION URGENTE

E tabata un reunion urgente cu a wordo pidi, ya cu e funcionarionan tin miedo cu door di cambio den e sistema di dump, un grupo lo perde nan trabou.“Esaki absolutamente no ta e caso. Recientemente mi a informa nan caba cu e maneho pa cu dump no ta significa cu nan lo perde nan trabou. Nan trabou ta garantisa,” e mandatario a enfatisa na final di encuentro cu sindicatonan SEPPA, Magaly Brito y Raymundo Marlin, y STA, Diego de Cuba, kende ta esun cu a pidi un reunion cu Gobierno. 

PREOCUPACION PA PERDE TRABOU

E preocupacion ta cu e trahadonan di SERLIMAR lo perde nan trabou como cu tin pensa di cera dump. “Mi a splica nan, un biaha mas, cu esaki no ta caso! Gobierno no tin intencion di laga niun hende bay cas! E trahadonan di SERLIMAR tin nan funcion y SERLIMAR tin su derecho di existencia y ta haciendo un bon trabou pa Gobierno.”E preocupacion di Gobierno, Minister de Meza a bisa, ta e situacion reinante na Parkietenbos. E sistema cu ta uza pa maneha dump, ta algo cu Gobierno ta haya cu mester cambia. E situacion actual no por sigui, e ta hopi satura (yen) y ya a yega e momento cu mester sanea e dump di Parkietenbos y crea un espacio nobo, unda cu SERLIMAR lo haci su actividadnan relaciona cu e desperdicio di Aruba. E trahadonan kier a tende di e sindicato, cua ta e otro lugar (espacio nobo) cu gobierno ta referi na dje, pero e sindicato no por a bisa e trahadonan pasobra gobierno no a bisa nan. 

REUNION DIAMARS AWOR

E trahadonan a wordo priminti cu lo reuni den conseho di minister diamars awor y dicidi riba e tema aki. Presidente di sindicato STA Diego de Cuba a bisa e trahadonan despues cu nan lo manda un carta pa gobierno exigiendo pa participa nan e desicion diamars mes.