Schwengle: No ta sorprendi cu caso di fraude cu receta illegal

ORANJESTAD - Minister di Salud Alex Schwengle no ta sorprendi cu e caso di fraude den prescribi recepta ilegal.  E mandatario ta referi na un caso delicado y peligroso cu a sosode y pa cual a cuminsa un investigacion di departamento di inspectie di medicina. Kehonan ricibi a pone e departamento inicia e investigacion e tempo ey, cu a encera tambe un peticion pa tur boticario pa nan entrega copia di recetanan cu a wordo otorga pa un consultorio particular na Ponton. 

REACCION RIBA INVESTIGACION

Den un reaccion pa e vespertino Amigoe luna pasa, e lugar en cuestion esta Urgent Care Aruba ta bisa cu nan no sa nada di e investigacion. E inspector general di IVA (Inspectie Volksgezondheid Aruba) Dorylee Lopez Penha a confirma e tempo ey na e portal aki cu en berdad tin un investigacion andando, pero cu no por a bisa mucho cos mas. Awe minister di Salud Alex Schwengle ta bisa e portal aki cu e no ta sorprendi di e informacion aki. E portal aki a tuma contacto cu abogado di e consultorio medico, pero nan no tabata disponibel pa comentario y despues no a reacciona mas. 

PRACTICA ILLEGAL

Mientras cu e caso no a haya mucho publicidad otro cu un articulo luna pasa den e vespertino Amigoe, e caso (di prescribi receta ilegal)  ta bon conoci na Aruba pa varios boticario. Varios a bisa e portal aki cu nan ta na altura y a cumpli cu e peticion di inspectie. E carta cu inspectie a manda luna pasa (wak e carta AKI), ta pidi pa tur boticario entrega pues e copia di recetanan data di e consultorio aki. Pa ley, ta prohibi pa un persona traha como medico na Aruba sin registracion na DVG (Directie Volks Gezondheid). Y pa por logra esaki e medico mester ta inscribi den e registro BIG (Beroepen in de Individuele Gezondheidszorg). Pa logra esaki e medico mester cana henter un caminda largo, incluyendo specialisacion y acreditacion. Problema ta cu na e consultorio en cuestion, lo tin dos docter cu no ta corectamente registra, y como tal lo no tin autorisacion pa scibi receta. Y segun informacion ricibi, Urgent Care lo a wordo atendi riba e situacion pa DVG. Y basa riba e carta cu e departamento a manda na mei, por deduci cu en berdad tin cosnan iregular ta sosodiendo. 

MINISTER SU PROME REACCION RIBA E CASO AKI

Segun e mandatario den su prome reaccion publico riba e caso, e ta bisa e portal aki cu prome cu tur cos mester investiga, si ta berdad cu e consultorio menciona tabata haci e practica aki. Y con bin esaki ta tumando lugar, y si no tin mechanismo 'in place' pa controla esaki. "Boticanan ta suppose di controla semper riba autenticidad di e recepta" Schwengle a bisa e portal aki. Esey ta encera entre otro si e receta ta bon skirbi, riba e papel adecuado, si e persona ta registra. Sino e receta no ta wordo paga pa AZV tampoco. E mandatario a confirma cu ta a base di keho(nan ) cu a drenta, cu a bay haci e investigacion. "Mi no a haya ningun relato ainda pasobra nan ta bezig ainda" e mandatario a continua bisando. For di e inspector general Lopez Penha, e portal aki a compronde awe cu e investigacion por dura un luna mas prome cu por sa su resultado. E investigacion mester trece claridad si en berdad tin recetanan cu a wordo honra, pero no ta cuadra, y si ta berdad, con bin e protocol no a wordo atendi. "Pasobra no solamente esun cu a skirbi e receta ilegalmente a haci un fout, pero e botica tambe a honra un onbevoegd recept" e mandatario a bisa. Algo cu e ta considera hopi peligroso. 

PAKICO MINISTER A LAGA ESAKI YEGA ASINA LEU

Preguntanan den direccion di e mandatario, manera con bin e cos aki por a pasa y con bin minister por a permiti e asunto aki di yega asina leu, ta absurdo segun e mandatario. "Ta juist e minister aki a zorg pa bin cu inspectie" Schwengle a defende su curpa. A tarda un poco berdad pa bin cu e inspectie, pero awor e ta in place. Pero no ta asunto di recepta so tin fout, sino un investigacion riba practica di docter di cas y botica tambe a mustra cu tin hopi cos cu tin cu mehora aki tambe. E mandatario no ta sorprendi cu e caso di fraude aki. "Mi no ta sorprendi. Ta p'esey mes mi tabata kier e inspectie in place" e mandatario a bisa. De hecho, e mandatario ta bisa cu tin añanan largo esaki tabata sosode, pero e prioridad pa atende cu e problema, tabata otro caminda cerca mandatarionan. Danki na e investigacion aki, por bin sali na cla cu hendenan cu a keda afecta pa motibo di e fraude aki, por entrega keho awor. Mientras cu e mandatario ta keda esun responsabel finalmente pa e consecuencia politico, e ta laga tur cos den man di e inspectie, debi cu e mester ta mas independiente posibel. "Ami ta duna inspectie e espacio pa nan por haci nan trabou debidamente. Mi ta ga er van uit cu nan ta hib'ele na un manera obhetivo, basa riba normanan", e mandatario a finalisa bisando. Scucha e entrevista cu e minister AKI.