Meteo vigilando posibel tormenta tropical yegando nos region

ORANJESTAD - Servicio meteorologico ta vigilando un ola tropical (disturbio) cu ta organisando su mes pa drenta nos region di Caribe. Diadomingo 8'or e centro di e disturbio tabata ubica 7.7 grado North, y 51.4 grado West. E sistema ta moviendo direccion west cu e velocidad di 37 km pa ora. Ta spera un trayecto basta lihe direccion west/noord west pa e proximo 48 hora. Riba e trayectoria aki e disturbio lo yega Isla Ariba dialuna anochi y diamars. Biento maximo sostene ta di 55 km pa ora. Segun servicio meteorologico, e disturbio ta pronostica pa yega intensidad di nivel di tormenta tropical awe nochi of dialuna prome cu e yega Isla Riba. Awacero y tormenta ta gradualmente birando miho organisa, y desaroyo adicional ta probabel den e proximo dianan. Dialuna mainta gobierno ta dunando un conferencia di prensa riba e tema aki.

EFECTO PA ARUBA

Si e sistema wanta y bira un tormenta tropical, e por pasa net panort di Aruba como un ciclone zwak of un ola tropical fuerte diamars anochi pa diaranson. Pero ta mustra cu e por perde forsa prome cu e yega Aruba. Sinembargo mirando e cercania di e disturbio, e por afecta e aire rond di nos y haci'e instabil, induciendo awacero y tormenta. Servicio meteorologico di Aruba ta subraya cu e momento aki Aruba no ta bou di un alerta di tormenta tropical. Si ta necesario, lo avisa apropiadamente.