Gobierno a topa cu van Zwol y Roes dialuna

ORANJESTAD – Reunionnan entre gobernantenan hulandes y di Aruba a continua dialuna mainta riba temanan di presupuesto y tambe husticia. Manera cu NoticiaCla.com a raporta den forma di primicia, e delegacion hulandes presidi pa secretario general hualdnes pa asuntonan di Reino Hulandes, Richard van Zwol a yega Aruba diadomingo hunto cu director general di husticia hulandes Gerard Roes.

E prome encuentro tabata diadomingo anochi durante un cena, unda cu nan a topa cu representantenan di e aparato di estranheria (imigracion, dimas, iasa), durante cual cena, tabatin cierto intercambionan cu dado momento a conduci na cierto discusion. Dialuna mainta e delegacion a desayuna cu minister Angel Bermudez di Finanzas, sigui pa un encuentro cu minister di husticia Arthur Dowers. E contenido di e reunionnan aki ainda no ta conoci, pero NoticiaCla.com a compronde cu segun e oficina di ministerio di husticia cu ta trata simplemente di un reunion di ‘conocemento’, unda cu van Zwol a bin ‘presenta’ e director general di husticia Roes na e ministerionan den region. “Un reunion cu tabata planea caba”, segun e informacion a wordo duna.

NoticiaCla.com mientrastanto a compronde cu un di e temanan(manera indica anteriormente) ta cu kier a atende e asunto di imigracion y e proceso di estranheria, riba cual a tende cu tin varios ‘iregularidadnan’ pa cual mester di atencion di forma mas serio. Riba e fotonan suministra pa ministerio di husticia, por mira e reunion di e delegacion hulandes serca minister di husticia Arthur Dowers dialuna mainta.