IMF den relato final di Aruba ta sugeri mas medida na gobierno

WASHINGTON - Mientras cu mayoria di e metanan fiscal di gobierno di Aruba ta apropia, Fondo Monetario Internacional (IMF) ta recomenda pa gobierno tuma mas medida, y haci AZV e.o. financiieramente independiente. Esaki ta entre e comentarionan duna e siman aki den nan relato publico final di nan bishita pa Aruba recientemente. E directiva ehecutivo di  IMF e siman aki a publica e rapport ratifica  di e team cu a bishita Aruba na mei ultimo, y a dicidi cu no tabata necesario pa tene un reunion formal pa haci tal. E rapport ta repasa e situacion financiero economico di nos isla, manera a relata den e rapport inicial luna pasa

ANALISIS DI E DIRECTIVA EHECUTIVO

E directiva ta mustra cu e crecemento di Aruba su economia ta debil pero ta premira pa crece gradualmente. Un caida temporal den actividadnan turistico di Aruba y consolidacion fiscal a conduci na actividad economico swak desde 2015, IMF ta sigui bisa. e economia ta premira pa recupera gradualmente, danki parcialmente na inversionnan relaciona cu e refineria y proyectonan PPP andando.  

Risico di e panorama ta inclina den direccion abou. Retraso den inversionan relaciona cu e refineria ta keda un risico notable den e termino cercano. E crisis creciente na Venezuela tambe ta crea un otro risico pa e turismo di Aruba. Riba termino medio, un cambio di turista pa Cuba, lo por tin un implicacion negativo pa Aruba. Di otro banda, un expansion fiscal Mericano por tin su efecto positivo pa turismo di Aruba, primordialmente den demanda pa servicionan economico comparti.  

TA RECOMENDA MEDIDA ADICIONAL 

Gobierno su metanan fiscal ta apropia segun IMF. Basa riba e leynan actual, e balansa fiscal general lo mehora y keda positivo riba termino medio. Si e metanan aki logra, debe di gobierno lo baha. E politica monetario ta apropia. Mirando e crecemento abou proyecta y e tasa di inflacion, y prueba cu economia a slack un poco, IMF no ta mira motibo pa adapta e politica monetario. Pero si tin señal cu esaki por bira malo, gobierno mester ta cla pa ahusta e politica aki apropiadamente.  

Tambe, pa yega e metanan fiscal, gobierno mester tuma medida adicional. E tamaño di e esfuerso fiscal, lo depende di e forsa di e crecemento di e producto bruto interno, cu ta keda insigur. Como tal e staff ta recomenda medida fisca, adiciona, pa logra yega e metanan. Den pasado IMF a idenfica algun di e medidanan aki. Entre nan, aumenta esfuerso pa genera entrada, den un forma mas grandi di coleccion di impuesto indirecto. Mester tin un prioridad pa loke ta reduccion di gastonan relaciona cu salario. Tambe mester tuma medida pa sigura cu e sistema di AZV bira independiente financieramente. Lesa e relato completo AKI.