Intencion pa traha Bahia Principe San Nicolas den 20 luna

ORANJESTAD – Pa october 2016, e prome 300 cambernan di e proyecto hotelero Bahia Principe mester ta cla. Esaki minister di Turismo Otmar Oduber a anuncia dialuna mainta, confirmando tambe e informacion di NoticiaClac.com cu october proximo (dia 2) e doñonan di e cadena hotelero lo firma un Memorandum of Understanding (MOU) cu gobierno di Aruba cu e intencion di cuminsa construccion na februari di 2015 caba y finalisacion di e prome fase e aña siguiente.

SHOPPING MALL

Hunto cu e proyecto hotelero, tin un proyecto di shopping mall mara na dje, di 20 tienda cu , segun siguransa di e mandatario na NoticiaCla.com, lo no tin ningun efecto pa e tiendanan den caya principal di San Nicolas. E hecho cu ta trata di un hotel “all inclusive” no ta un problema pa San Nicolas ya cu ‘despues di 3 dia den e hotel, e turistanan lo sali for di e hotel pa explora e cercania’, Oduber a sigui sigura NoticiaCla.com.

DETALLES

E inversion (financia completo pa e famia Pinjero) lo ta uno di entre 80 pa 100 miyon dollar, y lo traduci den un propiedad di 300 camber, ubica den un toren di 5 piso y e resto di edificio reparti riba 3 piso di camber. Na tur, e compania a mustra cu nan lo mester di un total di entre 300 pa 450 trahado pa por completa e hotel den un periodo di 20 luna. Segun e mandatario di turismo, e peticion inicial tabata 14 luna, pero a logra ‘stretch’ esaki pa 20 luna pa asina evita cu mester di uza mas trahado. “Tur trahado lo ta local, pues no ta duna permiso pa ningun trahado den exterior” Oduber a sigui sigura NoticiaCla.com.