Wever: Gobierno no ta cla pa otorga tereno na Metacorp ainda

ORANJESTAD - Gobierno a confronta e compania MetaCorp y E.de Veer Chain Theatres diabierna mainta riba e asunto di otorgamento di tereno 'wetland', y su tardansa pa cu esaki. Abogado pa gobierno, Celina Wever a refuta cualkier tardansa, mal intencion di gobierno y cu e compania mester tin pasenshi pa cu otorgamento di e derecho di erfpacht. Como tal, a pidi hues pa rechasa e demanda y laga e proceso cana su caminda normal. 

PRESION DI META

Wever a admiti cu enberdad gobierno a duna e compania e derecho di opcion pa e tereno menciona na januari di e aña aki. Mirando e localidad di e tereno, a mara e opcion na un lista hopi pisa di condicion pa cumpli cune, prome cu pasa pa otorga e tereno como erfpacht. Ningun caminda den e MB (Ministeriele Beschikking), ta para cu gobierno ta mara na un tempo pa por otorga e tereno aki. Ademas, e situacion ta uno complica cu ta rekeri hopi estudio. Y e rapport di DOW ta pidi netamente esaki. Y gobierno ainda no ta cla cu e investigacion y como tal e compania en cuestion mester warda trankil pa e investigacion aki caba. 

ACTUANDO DI MALA FE?

Ningun momento gobierno ta actuando di mala fe contra e compania, pero no por ta asina cu ta pura gobierno pa otorga e tereno, 'pasobra e compania por sufri daño financiero si tin tardansa'. Wever a mustra cu esey ta e risico comercial cu cada compania ta tuma ora di embarga riba un proyecto asina. Sigur ora cu ta trata un tereno manera esun cu a wordo  duna como opcion. A mara e opcion na hopi rekisito hopi pisa, pasobra unabez cu duna e tereno, e ta bira irreversible. Pues mester tene bon cuenta ora cu haci esaki. Ademas, segun Wever, gobierno no ta mara y obliga pa duna e compania e tereno despues cu a duna nan e opcion. De hecho, minister por para esaki tambe y ta su derecho pa haci ta. "Si e compania tabata mara na tempo y tabata un  asunto asina importante, e mester a haci mencion di esey. Algo cu no a sosode" Wever a sigui bisa. "Pais Aruba no por wordo hansha pa keda cla. E ta tuma tempo" e abogado a sigui bisa. Pa loke ta e bouwvergunning, e abogado a mustra cu ta apenas na maart esaki a wordo entrega y awor nos ta na juni. Pues e compania ta mucho pura. Teniendo esaki na cuenta, abogado Wever a pidi hues pa rechasa e demanda di e contra partido. E caso ta sigui diamars mainta 8:30.