Tardansa den otorga tereno na MetaCorp tin consecuencia pa proyecto

ORANJESTAD - Corte a suspende tratamento di e caso di MetaCorp/E.de Veer Chain Theatres contra gobierno te diamars proximo. Motibo ta cu un di e partidonan (Aruba Birdlife Conservation) no a haya suficiente tempo pa prepara su mes pa e caso. Prome cu esey sinembargo, abogadonan di e respectivo otro partidonan si a presenta nan respectivo defensa, prome cu huez a opta pa suspende e caso. Notable tabata e interes grandi pa e caso, tanto di partidonan interesa como medionan di prensa. 

ARGUMENTONAN PRINCIPAL DI PARTIDONAN

Den e 'prome tanda' e argumento tabata cu gobierno ta tardando cu e otorgacion di e tereno cu por tin consecuencia economico pa e compania en cuestion. Gobierno su argumento ta cu nan no ta cla pa otorga e tereno ainda y no por pura gobierno pa haci esaki basa riba un 'urgencia economico'. ABC a uni su mes mientrastanto cu gobierno, den proteccion di medio ambiente. E caso ta sigui diamars mainta 8:30.

DEFENSA DI METACORP/E.DE VEER CHAIN THEATRES

Gobierno a duna un option pa tereno na januari ultimo (5 di januari 2017), y MetaCorp a cumpli cu tur rekisito, pero gobierno ta tardando cu e otorgamento di e tereno y consecuentemente e bouwvergunning. Como tal cu intermediacion di hues, MetaCorp kier evita mas tardansa den e proceso, pa nan por continua cu nan plan. Esaki ta e base di e caso cu e compania a cuminsa contra gobierno. Abogado defensor  Patrick Brown a mustra cu tardansa den otorgamento di e tereno erfpacht, ta trece e proyecto su ehecucion den peliger, mirando cu e ta mara na varios contract comercial cu ta mara na tempo di ehecucion. Si faya cu esaki, e por traduci den problema economico pa e proyecto. Brown a argumenta cu nan a cumpli cu tur e rekisitonan cu a wordo pidi di nan, a haya conseho positivo di varios instancia cu ta mustra cu no tin problema si e compania haya e tereno aki pa desaroyo economico. E problema cu tin ta cu e ta trata un tereno conoci como 'wetland', cu por tin impacto ambiental si no trata esaki corectamente. Brown a sigura cu e compania a cumpli cu tur rekisito, y 'exigencia' cu ta garantisa cu e tereno no ta sufri daño ambiental. De hecho a surpasa cualkier rekisito y a hasta aumenta e mehoracion di e tereno ora cu esaki ta den uso. Como tal no ta compronde cu awor pa un tardansa na DOW, e tereno no a wordo otorga ainda. A cuestiona e experticio di e director di e departamento Marlon Croes, cu den un rapport recien a bisa e ministerio di infrastructura, cu mester haci mas investigacion riba e situacion di tereno aki. Abogado Brown a cuestiona e competencia y experticio di e director y a mustra cu e no tin e competencia pa haci tal desicion. 

URGENCIA PA HAYA E TERENO 

E urgencia cu e compania tin, segun e abogado, ta cu manera indica caba, e compania a cera varios acuerdo y contracto cu ta mara na tempo. Entre nan, (ta trata di un tereno riba cual ta bay desaroya un cinema grandi), tin un tempo di construccion di 52 siman (un aña) cu ta pone nan na july 2018 pa termina e proyecto. Cu esaki den bista, e contracto actual cu Paseo Herencia (unda e compania tin su cinemas ubica) ta vence e periodo ey. Ademas, a cera un acuerdo cu e compania IMAX cu ta provee proyectornan ultramoderno pa e compania local usa den nan cinema. Pero e unico forma cu e ekiponan costoso aki por ta comercialmente rendabel, ta si uz'e den un forma di exclusividad. Problema ta cu IMAX no ta bay sinta warda eternamente, y eventualmente por bay na e competencia (Caribbean Cinemas), si surgi un tardansa den e proyecto. Como tal tin un urgencia pa e compania haya e tereno otorga, pa e por cuminsa construi. Y tur esaki mester sosode den e simannan nos dilanti. 

ADMICION ABC 

Pa loke ta e partido ABC (Aruba Birdlife Conservation), a pidi pa declara nan inadmisible, mirando cu nan no tin argumento pa para ariba. A cita varios caso di pasado recien, comparando esaki cu otro y mustrando cu den e caso aki, e situacion ta diferente y cu no ta trata di tereno riba tereno berde, sino wetland cu tin permiso pa traha, contal cu tene nan mes cu un serie di rekisito. Den un otro articulo lo relata e version di abogado di gobierno Celina Wever.