DOW: Lo conecta e 4 camindanan riba rotonde Pos Chikito

ORANJESTAD - Entrante dialuna 19 di juni venidero lo tin algun desviacion importante di trafico riba e caretera Green Corridor y cu lo dura 5 siman y lo ta vigente 24 or pa dia. Automobilistanan biniendo di Oranjestad bayendo pa San Nicolas por bira na rotonde di Ser’i Teishi na man drechi y tuma e caminda di Barcadera direccion pa Balashi y yega te na e rotonde di Pos Chikito y aki sigui pa San Nicolas. Tambe por sigui di rotonde di Ser’i Teishi pa rotonde di Kibaima y despues sigui riba caminda grandi te na e baricada cu tin borchi cu indicacion.

Automobilistanan biniendo for di Santa Cruz bayendo pa San Nicolas lo tin cu tuma e ruta rond di e rotonde di Kibaima subi e caminda grandi normal sigui te na e baricada y  borchinan cu indicacion pa bira na man drechi pa yega Pos Chikito pasa riba e caminda dilanti di Kukwisa school te  na e rotonde di Pos Chikito y aki sigui pa San Nicolas. 

Esnan biniendo for di direccion San Nicolas bayendo pa Oranjestad lo tin cu bira na rotonde di Pos Chikito tuma e caminda di patras dilanti di Kukwisa school sigui te na Barcadera, aki bira na man drechi tuma e caminda nobo pa Ser’i Teishi te cu e rotonde y bira direccion Oranjestad. 

Automobilistanan cu ta biniendo di San Nicolas cu kier bay Santa Cruz tin cu yega na e rotonde di Pos Chikito  tuma e caminda cu ta pasa dilanti di Kuwisa school yega te na e baricada y borchi cu ta indica pa bira na man drechi, sigui e caminda pa despues bira na man robes pa subi e caminda grandi direccion rotonde di Kibaima y tuma direccion Santa Cruz. E desviacionnan aki ta relaciona cu e trabaonan grandi pa conecta Green Corridor su cuatro camindanan (2 x 2) cu e rotonde di Pos Chikito. Lo traha den dia y anochi pa keda cla mas pronto posibel cu trabounan.