S&P a cambia panorama di Aruba di positivo pa stabil

NEW YORK/ORANJESTAD  - E agencia di calificacion Standard & Poors diaranson a revisa e panorama di Aruba di positivo pa stabil. Mes momento ta afirma e rating atrobe di aña pasa di BBB+/A-2. Esey ta un mehoracion leve pa Aruba, aunke nan no por duna garantia cu e rating ta bay cambia. "Contento cu Aruba a mantene su rating. Esaki sigur ta un muestra di confiansa den maneho financiero-economico di Gabinete Mike Eman II" tabata e prome reaccion di gobierno via minister di economia Richard Arends na NoticiaCla. 

BISTA DI S&P

Segun S&P, un recuperacion di e economia di Aruba por dura mas largo cu a spera. E rating mes momento ta refleha un laso fuerte cu Hulanda, cu tin un economia sano pa standardnan regional. Segun S&P, nan analisis ta refleha un speransa di ehecucion di medidanan economico hasta despues di eleccion mas laat e aña aki, incluyendo consolidacion fiscal andando cu ta stabilisa e debe general di gobierno y ta sostene likides externo. 

EFECTO DI REFINERIA

S&P ta mustra cu e revision ta refleha tambe un crecemento di economia mas lento cu a spera den 2016, y nan opinion ta cu e crecemento por aumenta mas laat e aña aki, debi na e retraso di e reapertura di e refineria. E ratings, mes momento, ta mantene halto debi na e relacion cu Aruba tin cu Hulanda. Mes momento ta papia di e economia habri di Aruba, cu e dependencia halto riba turismo, e flexibilidad limita monetario y e crecemento economico pober. Nan ta premira cu e PIB (Producto Interno Bruto) lo ta rond di 24 mil dollar na 2017, cu ta mas halto cu mayoria di su bisiñanan di Caribe y Latino America. Lesa e rapport completo AKI.