OM: No a debolbe cosnan confisca di minister Paul Croes na dje

ORANJESTAD - MInisterio publico diahuebs a clarifica e confusion cu a surgi relaciona cu e investigacion den e caso penal di minister Paul Croes. Den medionan di comunicacion, a start un confusion tocante e hecho cu supuestamente lo a debolbe cosnan cu lo a wordo tuma den beslag cerca sospechoso Paul Croes. Ministerio Publico ta haya hopi importante pa aclarea e confusion aki. 

Durante e investigacion IBIS, hues-comisario a tuma cosnan den beslag na Bestuurskantoor, bou di cual cosnan for di oficina di sospechoso Croes. Recientemente algun di e cosnan cu a wordo tuma den beslag na Bestuurskantoor, a wordo debolbi na Bestuurskantoor. Bou di e cosnan aki tin algun USB-stick, computernan, laptopnan y un telefon blackberry. Si algun di cosnan aki a wordo duna na sospechoso Croes dor di Bestuurskantoor of den nomber di Bestuurskantoor, no ta conoci na Ministerio Publico, ni e ta responsabilidad di Ministerio Publico tampoco. 

E cosnan cu hues-comisario a tuma den beslag den e investigacion IBIS den cas di sospechoso Croes, no a wordo duna back na Croes. E cosnan aki ta sigui den beslag.

Cosnan cu wordo tuma den beslag na benificio di waarheidsvinding den un investigacion, ta wordo debolbi asina cu e investigacion riba e cosnan ey ta cla. Cu cosnan wordo debolbi na un sospechoso durante e investigacion penal no ta bisa nada tocante e sospecho of e resultadonan di e caso penal. E ta significa unicamente cu e investigacion riba e cosnan specifico ey ta cla.