Decision riba futuro di director Telearuba aki dos siman

ORANJESTAD – Aki dos siman decision ta cay si e director actual di e planta di television Telearuba ta keda cu su funcion of si e ta wordo reemplaza fin di aña. E contracto di e actual director Victor ‘Toko’ Winklaar ta vence dia 31 di december proximo manera cu e minister, Mike de Meza a confirma pa NoticiaCla.com dialuna merdia. Sea ta busca un persona nobo, of ta (bolbe) extende e contracto. Un paso cu segun fuentenan fidedigno di NoticiaCla.com ta mustra cu lo no sosode. “Su contracto no ta wordo extendi e biaha aki. E sa esey” e fuente serca di e hunta a bisa NoticiaCla.com. E mandatario sinembargo por a confirma esaki ainda.

“Internamente mi tin cu tene un reunion di evaluacion cu Setar (cu ta representa e accionnan di Telearuba) y como minister cu ta representa e accionnan, unda cu nos tin cu discuti esaki” e mandatario a bisa. “ Ora nos pasa door di e analisis aki mi por contesta e pregunta ey”.

Esaki ta e di dos biaha cu e trahadonan ta pasa door di e situacion aki, unda cu tin incertidumbre kico ta pasa cu e director di e planta. Na juni ultimo tabatin un situacion similar unda cu no tabata sigur cu e director lo a keda. Esaki basa riba declaracionnan di gobierno mes cu nan lo no tabata mucho contento cu e trabou di e director. Informacion cu NoticiaCla.com tin ta cu na ultimo momento, ta prome minister Eman a cay aden y a prolonga e contracto aki temporalmente pa 6 luna, cumprando mas tempo pa dicidi riba e topico aki. NoticiaCla.com a compronde cu tabatin hopi factornan externo otro cu tabata e momento ey mas importante pa atende, y kier a duna mas tempo pa tuma un decision corecto. A opta e ora pa e extension ‘temporal’ di 6 luna.

Pa e trahadonan, e tabata un momento fastioso ya cu nan no tabata sa kico pa spera. No tabatin un comunicacion claro riba e situacion aki. Ora cu e decision medio juni a cay finalmente cu ta extende e contracto temporal, ningun hende no a wordo informa oficialmente sino mas bien, tabata ‘business’ as usual na e canal.