Compania ta hiba Gobierno Corte pa a tranca otorgamento di tereno duna

ORANJESTAD - MetaCorp y E. de Veer Chain Theatres NV ta hiba pais Aruba (lesa: minister Benny Sevinger) corte diabierna mainta pa motibo cu tin indicacion cu e mandatario of su departamento a para of tranca  otorgamento di un tereno previamente otorga. Mes momento durante investigacion riba e caso aki, NoticiaCla a confirma cu Aruba BirdLife Conservation tambe a haci un peticion na Corte awe tardi pa uni su mes cu Gobierno pa e caso. Ta trata di un tereno pariba di South Beach den area di Sasaki, cu mester a bira un tereno unda cu e compania ta preparando pa lansa otro negoshi grandi. 

MOTIBO DI BAY CORTE

NoticiaCla a compronde for di fuentenan cerca di e compania cu e motibo di META y E.De Veer Chain theatre pa bay corte, ta pasobra e tereno a keda otorga inicialmente, pero na caminda den forma no conoci, a tranca e proceso aki. Y for di abogadonan di ABC, a compronde cu e motibo cu nan kier uni cu gobierno, ta pa yuda para e otorgamento di tereno pasobra e tereno ta wordo considera un wetland protehi, cu no por wordo otorga. Posiblemente p'esey e proyecto a wordo tranca y no duna mas na e companianan menciona.  Inicialmente no ta cla pa e portal aki si ta minister a para e otorgamento of si pa otro motibo e proceso a tranca. Pero esey ta birando mas cla awo. 

FALTA CLARIDAD TOCH

Pa e compania mientrastanto nan no tin e claridad ey y ta bay corte pa haya clarificacion. Unico informacion cu e portal aki a haya di e fuentenan cerca di e compania, ta cu nan lo a wordo bisa cu e no por haya e tereno mas of cu nan no por haya informacion pakico a tranca e proyecto. Tur esaki mientras cu e compania a haci tur tramite caba pa inicia construccion di edificio pa nan proyecto nobo. Como tal e compania a opta pa hiba e mandatario corte, pa incumplimento di un acuerdo.  

NO TA PROME BIAHA CU ESAKI TA PASA

No ta e prome caso di tereno cu e mandatario ta haya su mes confronta cu ne mirando cu den pasado e mandatario a otorga tereno, pero despues a dicidi di sea para of tranca e proceso, of hala atras pa otro motibo. Tin cu a duna tereno, unda cu e compania a cuminsa construi, pero cu debi cu e ta riba un tereno supuestamente protehi, a para esaki. Tur ta motibonan cu a conduci cu e mandatario a hay'e den corte.