RED y su lider e sorpresa di encuesta NoticiaCla/Kvk/Doc Opleiding

ORANJESTAD – E gran ganador di e debate di Camara di Comercio a resulta e partido RED y nan lider Ricardo Croes. Asina e encuesta di NoticiaCla/Doc Opleiding/Camara di Comercio ta mustra. Gran mayoria di esnan encuesta (46%) no a cambia di pensamento pa ken nan lo vota. Gran mayoria a pidi pa e proximo debate tin mas interaccion entre e candidatonan. Bek pa e ganadornan, Ricardo Croes a haya e score mas halto di 7.5, y su partido a aumenta 10 punto di porcentahe di 2.6% pa 12.6%. Tambe den e encuesta aki, atrobe ta publica un actualisacion di e pregunta di cua partido ta na cabes aworaki. 

DETAYES DI E ENCUESTA

E biaha aki un total di 1349 a participa di cual 1236 persona a completa e encuesta. Pa e encuesta aki a haci pregunta specifico, cu a resulta efectivo pa Camara di Comercio pa haya feedback pa por mehora e proximo debate. Mirando cu e resultado tabata hopi grandi, e ta valioso. Mes momento mester corda cu e encuesta aki no ta cubri e isla completo votador. Como tal ningun partido mester reclama victoria cu e presentacion aki.

RESULTADONAN 

Pa loke ta esnan cu a sigui e debate, esaki tabata bastante y mayoria cu a responde na e encuesta aki tabata via television (67.2%). Interesante tabata cu un mayoria minimo di 49% no tabata satisfecho cu e prome debate y ta bisa tambe pakico. 45.4% si tabata contento. Pa loke ta e prestacion di e lidernan politico, aki Ricardo Croes di RED a score mas halto cu a haya e cifra di 7.5, sigui pa lider di MEP Evelyn Wever Croes cu 7.3, y Otmar Oduber di POR cu 4.6. Esun cu a presta mas malo tabata Holmo Henriquez cu 2.9. Mas cu 45% cu a participa, ta bisa cu e debate no a cambia nan opicion mientras cu mas di 25% sa awor pa ken nan vota, y e siguiente grupo ainda no sa pa ken nan vota. Entre e consehonan pa e debate, gran mayoria kier mira un cambio den forma di mas interaccion entre e lidernan, sigui pa mas tempo pa e lidernan papia. 

POPULARIDAD DI PARTIDO 

E parti popular di midi e popularidad di e partidonan tambe tabata interesante. Aki MEP a sali gana atrobe cu 31.5%, sigui pa e grupo cu no sa ainda cu a bira menos si na 17.4%. E sorpresa ta cu e partido RED a subi drasticamente di 2.7 pa 13%, pasando POR y keda na di tres lugar. AVP ta na di 4 lugar cu 10.3%. Tin un empate den e partidonan cu ta menos popular PDR y CURPA, ambos cu 0.3%. Tene na cuenta cu ambos partido no a participa ainda na un debate. Sinembargo partido RAIZ, siendo un partido 'den oprichting' cu tambe no a participa den un debate, a score miho cu 4 di e partidonan mas chikito, cu 1%. Por mira e resto di e resultado AKI.