Partido Raiz tambe ta participa na eleccion parlamentario na september

ORANJESTAD - E partido politico Raiz ta participa den e proximo eleccion parlamentario na september proximo. E partido riba nan pagina di FACEBOOK a reproduci un reseña di un raportahe di e vespertino AMIGOE di awe, unda cu e fundadornan Tai-Foo Lee y Ursell Arends ta confirma na e vespertino cu fin di luna nan ta lansa e partido social democrata, un partido centrista cu un draai progresivo social democrata. 

CAMPAÑA DIFERENTE

E vespertino ta sigui raporta cu e fundadornan ta sigura cu nan ta diferente, y esey kiermen entre otro cu nan no ta bin cu campaña di pega sticker, bandera y t-shirt. "Na su lugar nos ta dirigi nos mes riba e contenido, pa asina nos cambia e mentalidad traficional y anticua politico di nos isla" Lee ta sigui bisa. 

PARTICIPA DEN E ELECCION SIGUIENTE

Den e entrevista cu e vespertino, nan plan ta pa participa den e proximo eleccion y tambe den e proximo dos debatenan na juli y augustus. Durante e lansamento di e partido fin di luna, nan lo presenta nan lider y e programa completo di partido. Despues, nan tin 3 luna pa hiba campaña. Nan ta referi na e encuesta ultimo di NoticiaCla y Doc Opleiding, unda cu e.o. ta mustra cu ciudadanonan ta prefera 3 luna di hiba campaña. Logo ta di pagina di facebook di e partido.