Clarisca Velasquez toch ta bolbe riba lista di AVP pa proximo eleccion

ORANJESTAD - Contrario na informacion anterior difundi, parlamentario di partido AVP Clarisca Velasquez ta participa den e proximo eleccion atrobe riba e listsa berde. Asina e mes a confirma pa medio di un comunicado diaranson atardi. "Diaranson cu ta falta 100 dia pa eleccion pa parlamento di Aruba 2017 Clarisca Velasquez ta anuncia cu ela dicidi cu e ta keda riba lista pa reforsa partido AVP pa eleccion 2017 venidero" e comunicado ta bisa. Segun e comunicado,   Velasquez a realisa cu ainda falta mas trabou pa haci riba diferente tereno y husticia sigur cu e ta para pe den parlamento y p'esey tambe a tuma e desicion cu e ta keda reforsa partido AVP den e proximo eleccion. "Partido AVP a haci e mihor trabou pa Aruba pa medio di su gobierno y su parlamento y p'esey e ta keda riba lista di AVP pasobra no tin otro alternativa pa continua cu e bon trabou pa nos dushi Aruba" e comunicado ta sigui bisa. E intencion anterior tabata pa e sali for di parlamento y drenta cuerpo policial bek (e ta agente di polis), mirando cu e tabata siguiendo cierto cursonan referente su carera profesional como polis. Esey tabata indicacion cu e lo no bolbe riba lista. Despues e mes a informa cu e no ta bolbe. Esaki awor pues ta cambia. Velasquez ta keda riba e lista berde.