Gobierno y oposion den tangana pa keha otro

ORANJESTAD - Si prome ta partido MEP a entrega keho contra gobierno actual pa incumplimento di ley di comptabilidad, awor ta gobierno di Aruba ta esun cu kier entrega keho na Ministerio Publico. Manera NoticiaCla.com a raporta dialuna mainta caba den forma di primicia, Minister di turismo Otmar Oduber a anuncia cu ta evaluando pa haci esaki, argumentando cu e keho cu MEP a entrega contra gobierno siman pasa, ta uno basa riba falsedad. Y esaki tambe ta 'castigabel'. E suma segun Oduber, cu e ta wordo 'culpa' di a surpasa, ta 3 miyon, pero cu tin un splicacion pe. Segun tanto ministernan de Meza y Oduber dialuna, ta partido MEP a wordo presenta cu un 'overschrijding' di casi 100 miyon di presupuesto, pa cual mester a bin cu un supletoire begroting pa tapa e buraco aki. Oduber na su turno, ta mustra cu enberdad Controlaria General a haya cierto actonan cu ta considera 'overschrijding' pero mes momento ta mustra cu ta casonan cu tin splicacion pa nan. 

E mandatario di turismo a mustra e.o. cu ta trata di cosnan cu a tuma lugar den e parti di turismo, unda cu ta 'culpa' e ministerio di turismo di surpasa presupuesto p.e. cu 3 miyon florin. E suma exacto presupuesto (segun e grafico aki) , tabata 3.341.400, siendo cu a gasta 6.789.529, cu ta 3.448.129 mas cu a wordo prespuesta, o sea un aumento di 103%.

Esaki sinembargo, segun Oduber, ta hustifica door cu ta cosnan cu a tuma lugar e anja anterior pero a wordo paga y/of registra e anja despues. Como tal logicamente cierto gastonan 'den forma administrativo' a wordo surpasa, pero cu no ta cuestion cu a comete algo illegal y cu lo a usa placa pa p.e. otro metanan manera financia campanja di eleccion di 2013. 

Lider di fraccion di MEP como reaccion riba e intencion aki, ta mustra cu gobierno ta laat. E ta reacciona inicialmente riba declaracion di lider di e fraccion berde, Rene Herde cu ya for di fin di siman a indica cu lo kier entrega keho." Nan ta laat!" Wever ta bisa. E lider politico ta mustra cu gobierno a core traha un cuenta anual y entrega esaki sin splicacion. "Ta e ora ey nan mester a bin duna splicacion. No awor" Wever a sigui bisa. Ora cu NoticiaCla.com a pidi Wever pa reaccion, e lider politico a reacciona, bisando 'Mi no a entrega keho contra su ministerio" refiriendo na e ministerio di Oduber. "Mi a entrega keho contra e total y contra e hecho cu nan no a hustifica unda nan a overschrijd. No ta ami ta bisa esey. Ta ARA (Algemene Rekenkamer Aruba) a bisa esey y ARA a pidi pa splicacion y nan (gobierno) no a duna". Foto archivo ora cu MEP a entrega keho recientemente na Ministerio Publico.