Retraso reapertura refineria a afecta caha di gobierno

ORANJESTAD – Gobierno ta admiti cu e retraso di e reapertura di e refineria ta y a afecta e caha di gobierno. "Si ta berdad. Pero ora cu nos a entrega e presupuesto, nos a tene cuenta cu esey" minister di finanza Angel Bermudez a sigura e NoticiaCla e simana ki. Nan a ahusta e GDP cu ta e base di e calculacion di diferente entrada, pero tambe e deficit. "Consecuentemente nos a ahusta loke nos a presupuesta pa e diferente impuestonan cu ta suppose di ta relata na e GDP" e mandatario a bisa. GDP (Gross Domestic Product ta balor total di e productonan produci y servicio provee den un pais durante un aña. Na papiamento ta yama esaki e Producto Interno Bruto)

RETRASO DI GDP

Si e GDP tin un retraso door cu e refineria su reactividad tin un retraso, e ora berdad bo tin un retraso den e realisacion di e entradanan di gobierno. "Y nos ta teniendo cuenta cu esey", Bermudez a sigui bisa e portal aki. Un di e problemanan ta cu e ta genera un buraco den e presupuesto. Como tal e mandatario a sinta cu e hefenan di e refineria recientemente pa sa kico e situacion ta y kico tur nan por spera. "Na e momentonan aki, loke nan (CITGO) tin planifica y loke nan ta trahando ariba dje, ta cuadra cu loke nos tin den e momento aki como base di nos presupuesto y di nos calculacion" e mandatario a continua bisando. E CEO di CITGO di Merca ta yegando Aruba proximamente pa conclui cierto contractonan cu contratista y tambe e protocol cu DPL. "Pues e desaroyonan ta siguiendo segun nan ta programa. N'e momento aki nos no ta mira mas retraso pues nos ta keda basta confia cu na final nos lo realisa loke nos a presupuesta" Bermudez a bisa. E no ta descarta si cu e ta keda un reto. 

KICO TA PASA CU NO LOGRA 

Si dado caso cu gobierno no logra ricibi e entradanan presupuesta, tin cu 'carry forward' pa e proximo aña y incorpora esaki den e proximo presupuesto, esta di 2018. Esey kiermen cu lo tin cu coregi e presupuesto na dado momento pa e incorpora esaki den dje. "Si bo weita cu na di dos raportahe cu berdad nos ta bay cay cortico, p.e. tin cu tuma medida pa para e nieuwe verplichtingenan pa loke ta gobierno. Si en caso cu tin un retraso atrobe den e refineria, mester hala tur esaki pa e proximo añanan. Bermudez no tin problema cu esey. P'esey e di dos raportahe ta hopi esencial," e mandatario a finalisa bisando. 

E preocupacion di e gastonan di AZV ta realistico segun minister di finanza Angel Bermudez. Asina el a splica e NoticiaCla. “Den e añanan benidero nos mester ta hopi mas alerta con e gastonan ki ta desaroya, y mester wak bon con ta frena nan” e mandatario a bisa. Segun e mandatario, e tendencia cu tin e ultimo aña no por sigui e añanan benidero e mandatario a sigui bisa. Mes momento e retraso den e reapertura di refineria ta haya Nn ta keda cauteloso den e sentdo cu ta vigile tur luna. “Nos kier weita cu e gastonan lo wordo frena mas ainda door di e fondo di AZV mes” Bermudez a sigui bisa.