Dakota ta gana protesta contra Nacional, y Nacional awor a protesta

ORANJESTAD – E ekipo di futbol di Dakota a gana nan protest contra e ekipo di Nacional y lo mester a hunga e gran final di Futbol contra di RCA. Asina e portal di deporte 297 Sports a raporta. AVB a duna e ekipo amariyo rason den e caso di protesta contra di Nacional. Esaki ta significa cu Dakota a clasifica pa e gran final contra di RCA. Di otro banda, algun rato pasa despues e mesun portal a raporta cu Dirigente di Nacional, Sr. Silo Brete a bisa 297 Sports cu "Nacional lo bay beroep den e caso di protesta perdi contra di Dakota y no lo acepta esaki sin mas". Mientrastanto e conferencia di prensa pa toca e tema di e final di diasabra, a keda posponi awe merdia oficialmente. 

Despues cu AVB a duna nan veredicto na fabor di Dakota, 297sports a tuma contacto cu dirigente di Nacional, sr. Silo Brete cu a bisa cu Nacional no ta acepta e sentencia ki y lo bay den beroep. Esaki ta significa cu cosnan no a caba aki y Nacional lo bay hopi leu segun sr. Brete. Mucho mas Brete no kier a divulga. Pues cu diasabra awor lo hunga e prome wega di final, mester warda y wak con ta sigui. Fotos y relato cortesia 297 Sports. 

Manera ta conoci Dakota a protesta a base di e hecho cu Nacional lo a hunga cu cuater stranhero mientras regla ta bisa tres so ta permiti. Nacional ta desmenti esaki.