Legalidad directiva nobo partido PDR den man di hues

ORANJESTAD – Hues ta dicidi dia 4 di juli si Camara di Comercio a actua bon di rechasa e inscripcion di e ‘PDR nobo’ of no. Mirando cu tempo ta corto relaciona cu eleccion, hues SAP lo purba bin cu un sentencia prome. Awe mainta a tuma lugar e caso cu Alonso Tromp na nomber di PDR (nobo) a entama contra Kvk pasobra e gremio no kier a inscribi e directiva nobo den nan registro. KvK su argumento ta, cu no a haci tal pasobra no tin claridad riba e situacion interno di e partido y a opta pa un hues dicidi riba e tema. E lider (ainda) di e partido Andin Bikker ta argumenta cu Tromp a y ta actuando ilegal y no tin derecho di actua na nomber di e partido.

ANDIN TA CU POR OF PDR

Loke partidonan tabata cuestiona di otro tambe, ta unda e miembrecia di Bikker ta caba na PDR y unda e ta cuminsa cu e partido POR. Y si e asociacion cu Bikker a haci cu partido politico nobo POR, ta automaticamente expulse for di partido PDR. E discusion entre abogadonan tabata confuso, y hues lo por duna su interpretacion proximamente. Abogadonan a debati pa nan respectivo cliente basa riba nan informacion, pa purba duna claridad riba e situacion.

E CASO

Loke a resalta den e caso awe mainta ta cu tanto Tromp como Bikker nan interpretacion di e situacion tabata confuso y contradictorio a momentos, lagando lugar pa varios interpretacion. Hues tambe na dado momento a interumpi pa purba haya claridad. Base ta e asunto di miembrecia, nan registro y nan derecho basa riba statuto di partido. Pa abogado di Tromp, mr Faarup, no ta duda den integridad di e fundador principal Andin Bikker, ni cu el a logra voto pa drenta parlamento. Nan ta cuestiona sinembargo e accion di Camara di Comercio pa no kier a registra e directiva nobo. E base di e caso ta pa mustra y determina ken tur ta un miembro di directiva, ki tarea y poder nan tin, y ken no ta miembro. A mustra riba un lista di miembro cu nan ta considera miembronan valido. Huez sinembargo dado momento a hala atencion di e abogado y su cliente Tromp, con ta atende cu e lista di miembro, si nan no ta registra. Esaki pasobra tin un discusion cu miembronan di PDR mester haci peticion pa bira miembro y registra. Sinembargo a mustra cu esaki no ta e caso. Como tal, huez a puntra cu si nan no ta registra, con ta haci yama nan y atende cu nan. A splica cu nan tin nan informacion, ta comunica cu nan personalmente y atende cu nan.

CAMARA DI COMERCIO SU PONENCIA

Camara di Comercio a mustra cu nan ta considera e situacion den PDR como confuso y como tal ta haya prudente pa un hues determina y trece claridad den e asunto aki. Segun abogado di e gremio Daniel Rasmijn, no ta cla segun informacion y basa riba e statutonan, ken ta miembro y ken no y tampoco di directiva. A refuta cu su cliente (KvK) lo a actua incorecto door di no registra e directiva nobo. No ta cu nan a rechasa e peticion pa cambia e registro, sino nan a mas bien opta pa laga huez dicidi esey. Abogado Rasmijn a describi e situacion dentro di PDR como ‘extreme wanorde’, esta desorden extremo, pa loke ta e asunto aki.

ANDIN BIKKER

Andin Bikker tambe tabata un partido den e caso aki, mirando cu e ta considera ainda cu e ta e lider di e partido, y cu e actuacion di Tromp ta illegal. Den corte el a ripiti su alegacion publico, cu Tromp no ta actuando legalmente y cu e reunion yama di dia 18 di januari ultimo unda cu a nombra un directiva nobo, ta illegal y no tin base. A ripiti tambe cu Tromp no ta miembro, y cu ningun di nan no tin peticion pa bira miembro (por escrito). A yama e actuacion di Tromp como un ‘Coup d'état’ esta un golpi di estado den e partido, cometi convenientemente ora cu Bikker no tabata na Aruba. Notable tabata e argumento di banda di Bikker cu ta apenas april 2017 e partido POR, (cu e ta asocia cune) a keda registra como partido pa Conseho Supremo Electoral. Pues prome cu esey, cierto aspectonan no ta aplicabel manera cu Tromp kier pretende. Prome cu esey, Bikker tin (ainda) tur derecho den e partido.

REACCION HUES

Hues a cuestiona ambos partido (Tromp y Bikker) y nan respectivo abogado riba varios punto durante e caso. Tabata notable cu inicialmente tabatin hopi confusion riba e aspecto di ken ta miembro, con ta bira miembro, y ki ora un partido politico ta realmente un partido. Huez a cuestiona e actuacion di Tromp y su grupo, di a actua di un forma cu por tabata diferente. A opta pa basa riba comentario di miembronan, asumi cu Bikker y su grupo no ta parti mas di e partido. Y a uza e argumento e.o. cu ‘nan tin bandera y sticker’ riba nan auto y a haci cierto declaracionnan publico. Segun Hues, tabata mas prudente yama e miembronan aden pa puntra nan kico ta kico en bes di bay riba suposicion. A cuestion ambos partido riba e validez di nan lista. “Con ta haci controla e lista ken ta miembro y ken no” tabata un di e preguntanan cu hues a haci, con a establece e lista(nan) ey”, tabata mas di e preguntanan. A cuestiona abogado di Bikker cu ta usando leynan pa bringa nan caso, cu no ta aplicable na Aruba, y tabata compara hurisprudencia nan cu no ta aplicabel tampoco. A mustra cu ta dicta sentencia dia 4 di juli proximo, pero lo purba di delanta esaki mas hopi ainda.