Bermudez ta contradeci tono di preocupacion di CAFT riba rapport

ORANJESTAD – E tono di e carta di College Aruba Financieel Toezicht (Caft) a keda consistente e ultimo 7 pa 8 raportahe segun minister di finanza Angel Bermudez. E mandatario den su prome reaccion riba e 1e kwartaal rapport di 2017, ta mustra cu e ‘motibo pa preocupacion’ di CaFT no ta nada nobo. Pa loke ta e fayo den logra e meta, Bermudez ta sigura cu tin cu tene cuenta cu varios cos. Entre nan cu e entradanan ta varia y esey tin efecto riba e plachi financiero total. Bermudez mes momento no tin problema cu CAFT ta critico. “E ta tene nos skerpi tambe”.

ENTRADANAN

CAFT ta mustra cu nan no ta kere cu gobierno lo yega e norma di deficit pa 2017 cu ta poni na 0.5% y ta kere mas bien cu esaki lo yega 1.5%. Bermudez ta argumenta cu CAFT ta uza informacion y kier ‘exprapola’ (verspreid e riba e resto di aña) esaki pa henter e aña, locual nan no por haci. Entradanan ta varia y tin motibo pa esaki.  E ta referi e.o. na e patronchi di entrada di impuesto hecho cu na fin di 2015 a introduci VAS, pero a overlap e un poco pa 2016 siendo e prome aña. E aña aki VAS a bay prome na su fecha legal cu ta pone cu na mei di e aña, ta entrega bo aangifte y bo ta paga.  Esey kiermen cu e aña aki e di dos cuartal por mira un aumento den entrada di impuesto. Esaki ta simplemente parti pakico CAFT ta kere cu no lo yega e norma pasobra nan ta uza cifra awor, y ta exprapola esaki y haci como si fuera henter aña e patronchi di pago lo ta mescos. Algo cu segun Bermudez, no ta e caso. Y como tal a uza e ehempel di VAS. E mandatario ta mustra cu e di dos cuartal lo ta hopi indicativo di con e resto di aña lo ta.