Academico, Experto, e microfono ta dibo!

Academico, Experto, e microfono ta dibo!

Posted on 06/12/2017 4:44 pm AST | Updated on 06/12/2017 10:25 pm AST

Introduccion

Den paisnan desaroya nos ta ripara cu intelectualnan/experto/academiconan ta wordo pidi pa sali dilanti. Esaki ta pa motibo cu e populistanan tin e maña di pinta cosnan mas bunita cu nan ta o nan ta predica solucionnan facil, rapido y cu ta agrada tur envolvi. E politiconan aki ta duna un vista eroneo di e realidad y comunidad por bay kere y defende un posicion cu a lo largo ta perhudica su mes. Ta sosode mas y mas cu politiconan kier impresiona e pueblo votador pa haya su simpatia. Ta facil pa den campaña di eleccion cu politiconan ta trece ideanan fantastico, pero no ta realisable pa un o otro motibo.

Populistanan no tin mucho simpatia pa un experto/cientifico. Contrario na un politico e ultimo aki si mester presenta hechos, estudio y otro aspectonan concreto pa expone na un nivel halto y prueba su punto. Academiconan y expertonan ta wordo mira cu sospecho y ta wordo bisa cu nan ta troce palabra y tin prehuicio (biased).

Nos expertonan, sali dilanti

Den un comunidad chikito ta facil pa un politico tin credibilidad , ya cu hopi hende conoc'e, y por confia su palabra y sigui su tras ciegamente. Politica ta basa riba emocion pa genera un sentido di identificacion afectivo. P'esey mes tambe Pueblo ta wordo manteni dependiente cu poco conocemento profundo di topiconan y desaroyonan relevante den comunidad.

Na Aruba tin hopi topico cu mester wordo lusa, investiga, documenta y treci na publico na un manera obhetivo. Mucho frecuente nos hendenan ta accepta hopi cos sin cuestiona ken, kico, con, cuanto y pakico di e informacion y e interes su tras. Aki nos kier menciona topiconan di indole social, educativo, economico/financiero, legal, tecnico, politica nacional y internacional, medio-ambiente.

Sinembargo esnan den e comunidad cu a studia na un cierto nivel o cu a acumula cierto añanan di experiencia, mester sali dilanti y evalua e pensamentonan, ideanan y desaroyonan den nos comunidad. Nos tin hopi persona cu añanan di experiencia riba cierto topico, den cierto ramo o a haci estudio avansa na Hulanda, Merca, Canada y den Latino America.

Ademas anualmente tin un cantidad di studiante ta termina nan estudio na Universidad di Aruba y otro universidadnan den exterior, pero no ta comparti cu comunidad di Aruba e conocemento di nan specialisacion. Por ehempel pone un recorte chikito di nan investigacion y su relevancia pa e desaroyo aki.

Tur esnan menciona ta un fuente grandisimo di cientos di persona cu alto nivel di conocemento/estudio y entrenamiento/experiencia cu por duna un aporte grandi na educacion di nos pueblo door di presenta un topico di nan conocemiento o haci research di un preocupacion di e comunidad..? Di otro banda Gobierno tin e mal custumber cu ora mester un conseho ta busca un persona o un compania di afo cu ta bin saca informacion di nos expertonan aki na Aruba y bende e informacion cu gobierno. Nos expertonan den estranheria y local ta wordo neglisha descurasha aunke cuanto estudio y/o experiencia nan tin.

Con nos intelectualnan/expertonan ta bin na palabra??

E intencion ta cu nos expertonan ta expone na e pueblo di Aruba topiconan cu ta relevante den e comunidad. Nan mester evalua ideanan, plannan y gritonan emocional cu parce ta asina bunita pa e comunidad; nan mester comparti nan conocemento y asina yuda eleva conocemento general di nos hendenan.

E notanan/comentarionan aki mester wordo presenta na radio. Tin topiconan dificil, pero ta na e presentado pa trece esaki mas comprendibel pa e oyentenan. Cu e tecnologia moderno lo no ta dificil pa e personanan aki den exterior tambe por presenta bibo (viral) den un programa.

Pa esnan cu ta gusta lesa e presentacionnan aki por wordo publica tambe den tomonan durante aña. E publicacion por bin cu mas detayes di fuentenan di informacion.

Con ta organisa e presentacionnan.?

Mester tin un organisacion pa coordina e programa aki? E organisacion ta busca personanan pa un comision ad hoc. E miembronan di e comision ta tum'e contacto cu e expertonan y organisa y presentacionnan y e radio emisora cu lo pasa e programa semanalmente.Di e presentacionnan lo por compila un publicacion bi-anual.

Agustin Vrolijk

 

  • Opinion: Mi yui Po Sing Fan ta innocente

    Opinion:  Mi yui Po Sing Fan ta innocente

    Apreciabel sr Redactor. Na prome lugar mi ta grandicibo pa e espacio pa mi como mama di mi yui, Po Sing, por expresa mi mes tocante e caso di mi yui. Cu awa na wowo y un dolor inmenso mi a scucha con Juez den e caso di wayaca a sentencia mi yui na 20 anja di castigo di prizon. Ami como mama di mi yui sa cu mi yui ta innocente di tur e acusacion nan menciona. Na e inicio di e investigacion hopi cos a bai robez y mi ta di opinion cu esnan envolvi a busca y hasi envistigacion robez. No ta pasobra mi yui a duna Echabardo un lift y buske bek e mester tabata sa di e suceso aki. Pasobra ta hopi biaha mi yui sa duna Echebardo un lift y hopi otro hende mas hende den su bida. Esaki tabata algo comun pa mi yui. No ta paso mi yui a huur un auto pa Echebardo, kiermen cu mi yui tabata sa kiko e persona aki tabata di bai hasi pa cu e caso aki. Es mas e sa huur auto varios biaha pa Echebardo den pasado y sa huur pa otro hende tambe. Mi yui ta un persona cu semper a saka un man pa juda hende ora e por. Mi ta sinti cu husticia di Aruba cu tur respet, a faya y kier culpa mi yui pa sconde e berdad mes. Sra Juez, bin splica ami y mi famia, con por ta posibel cu mi yui tin tur cos den su bida, su mesun negoshi, su mesun plaka, su dos cas nan y mucho mas, kiko lo tabata su motibo pa laga comete un atraco sabiendo cu e tin tur cos y no falta nada. Nos por a scucha den corte con Echebardo a tilda e yui di e defunto y ningun musca a bula. Asina tin hopi cos bisa den corte cu no a sali den prensa y tambe cu no ta cuadra cu e realidad. Nos ta di opinion cu Sra Juez a wordu mal informa door di autoridadnan y e Fiscal concerni. Lamentablemente Echebardo a compromete su mes pa no a papia e berdad den corte. Por ultimo mi kier a remarka cu tin un diferencia grandi entre mi yui y e otro nan. Mi yui semper ta responsabel riba su mes y nunca a depende di su mama of tata. Pero e otro nan si. Nunca nos a laga sa cu nos no ta confia nos yui cu plaka. Por lo pronto te aki nan. Famia Fan.

  • Opinion: PA INTERES GENERAL!?

    Opinion: PA INTERES GENERAL!?

    pa Armand Hessels

  • Opinion: UN RST AUTONOMO?!

    Opinion: UN RST AUTONOMO?!

    Pa Armand Hessels

  • Opinion: Humilde

    Opinion: Humilde

    (PA ARMAND HESSELS)

  • Opinion: Secuencia robes

    Opinion: Secuencia robes

    SECUENCIA ROBES pa Armand Hessels

  • Opinion :Con a para cu e Proyecto di Isla di Oro

    Opinion :Con a para cu e Proyecto di Isla di Oro

    Skirbi pa Clyde Harms

  • Powered by SETAR