Bermudez ta refuta declaracion di CAft riba aumento di empleado

ORANJESTAD – E declaracion cu College Aruba Financieel Toezicht (CAft) cu gobierno a tuma considerablemente mas hende den servicio, no ta cuadra. Por lo menos, no segun minister di finanza Angel Bermudez. Den su prome reaccion riba e tema pa NoticiaCla e ta haya e argumento uza, ‘no corecto’. Bermudez ta referi na e rapport riba pagina 27, cu ta mustra cu e prome cuartal, e cantidad di empleadonan cu gobierno tin, ta mas abou compara cu aña pasa. “Mi no sa ki fuente nan ta uza” Bermudez a bisa e portal aki, indicando cu e fuente ey no ta bon.

CAFT TA GAÑA?

Mustrando cifra, e ta papia di cu e prome cuartal 2016, gobierno tabatin 3871 hende compara cu prome cuartal 2017, unda cu tabatin 3869, esta 2 hende menos. Ora cu NoticiaCla a puntra Bermudez si CAft ta gaña anto, e mandatario a bisa “Mi no ta bisa cu nan ta gaña. Mi ta bisabo cu e prome cuartal 2017 ta mas abou cu aña pasa. Anto e ora mi ta puntra, unda bo ta conclui cu tin un aumento barbaro di e cantidad di empleado” Bermudez a bisa. Ora cu a puntra e mandatario si e informacion e ora ey no ta berdad ela bay di acuerdo. “E no ta berdad!” E ta sigura cu e maneho di gobierno keto bay ta pa reduci e cantidad di empleado. E no sa ki fuente ta wordo uza, pero e sa cu no tin un aumento barbaro.

CON POR SPLICA E AUMENTO ANTO

A sigui insisti cu e mandatario, pa wak unda e diferencia aki por ta anto. E mandatario ta kere cu porta nan (CAft) ta bruha cu ne ta un proceso como aumento di personal. E ta splica cu cierto hendenan cu ta bou di contract, despues di algun tempo ta wordo cambia den un nombracion temporal di ambtenaar. Esaki ta un maneho di 3 aña pasa caba cu ta significa cu si bo ta riba contract pa algun tempo (3 pa 5 aña), y bo ta funcionando bon, bo ta haya un nombracion temporal. Esaki ta necesario segun Bermudez, pasobra den practica, esnan riba contract no por haya prestamo na banco pa un auto of hypotheek pa nan cas. “Si bo kier yama esey un tumamento di servicio, e no ta corecto. E ta un nombracion, pero e no ta un tumamento di servicio” Bermudez a sigui bisa. SCUCHA E ENTREVISTA AKI