Detencion persona sospecha di soborna minister Croes alarga cu 60 dia

ORANJESTAD - Ministerio Publico a alarga detencion di e persona sospecha di a soborna minister Paul Croes cu 60 dia. Den e investigacion penal Ibis (den cual entre otro, Minister Paul Croes ta wordo sospecha di ambtelijke corruptie, maluso di su funcion, mensensmokkel y labamento di placa) un di dos sospechoso a keda deteni. Ta trata di e tramitador F.D.S., kende a wordo deteni riba sospecho di actieve ambtelijke omkoping. Prome cu ne a keda deteni J.F., tambe tramitador.

Trabou of negoshi di tramitadornan manera J.F. en F.D.S. ta pa intermedia, contra pago, pa stranheronan den pidi permisonan di estadia.

Ambos ta wordo sospecha di a, entre otro, paga Minister Paul Croes en cambio pa e ontheffingnan di e arbeidsmarkttoets firma pa e Minister.

Hues-Comisario di Corte den Prome Instancia di Aruba a dicidi siman pasa cu tin suficiente motibo (ernstige bezwaren) cu tanto J.F. y F.D.S. a haci nan mes culpabel di a soborna Minister Croes. Hues-Comisario a dicidi pa duna ordo pa detencion (gevangenhouding) di J.F. pa 60 dia mas, riba exigencia di Fiscal di Husticia y considerando e interes di e investigacion penal.

E detencion di e otro sospechoso, F.D.S., a wordo alarga cu 16 dia (bewaring). Ministerio Publico no ta exclui cu den e periodo nos dilanti, lo exigi gevangenhouding di F.D.S. tambe. Ambos sospechoso ta keto bay den tur beperking (no mag di tin ningun contacto). E investigacion Ibis lo continua y den e periodo venidero lo sigui mas detencion.