Delegacion di Parlamento lo participa na IPKO e siman aki

ORANJESTAD - Den weekend a sali un delegacion di Aruba pa atende cu reunionnan di Interparlementair Koninkrijksoverleg na Hulanda dianan 14 te cu 16 di juni. E delegacion a ser lidera dor di Presidente di Parlamento, drs. Mervin Wyatt-Ras. Sr. Rene Herde como presidente di e comision di Asuntonan di Reino ta encarga cu presentacion di e temanan hunto cu e diferente miembronan di Parlamento di diferente fraccionnan. Temanan cu lo ser trata ta Geschillenregeling. Aki lo regla cual instancia/entidad/body ta responsabel pa intermedia ora di disputanan en especial huridico. Lo trata e tema tambe di oportunidadnan economico, hubentud y hobennan, tambe salubridad publico. Pa e dos puntonan di hubentud y salubridad miembronan di Parlamento a yega di skirbi rapport analizando e situacion na Aruba y den Reino. Lo trata tambe pobresa y micro-economia, seguridad y Reino den 2040. Integridad tambe lo ser trata. Presidente di Parlamento ariba e prome dia di reunion lo duna un discurso di apertura. Segun Wyatt-Ras ta di importancia pa por mantene contacto estrecho entre partnernan den Reino. Pa ora di bondad, pero tambe ora di conflicto por conta cu cooperacion di coleganan den Reino. E presidente ta spera cu e reunionnan lo ta fructifero. Foto ta archivo di NoticiaCla ultimo biaha e reunion a tuma lugar na Hulanda.