Jose Sprok durante simposio di curason: Inverti den bo salud pa evita problema di curason

ORANJESTAD Durante di e fin di siman tras di lomba Aruba Heart Foundation  a organisa un congreso cu a conta cu un tremendo organisacion y acogida. E aña aki nan a haya dos orador di Baptist Health di Merca, dos di Bucaramanga cu ta atendiendo e pashentnan di AZV, un dokter di Corsou como tambe un di Hulanda y e yiu di tera Dr. Sprok cu a bin di Costa Rica. E simposio aki tabata un dia so cu hopi informacion y cu oportunidad pa haci pregunta. El a bay dirigi na pashentnan, dokternan, personanan cu ta traha den salubridad publico y pa tur hende cu tabata kier mas informacion.

Velma Daal, Presidente di Aruba Heart Foundation a agrega cu esaki ta e di tres simposio cu nan ta organisa. Nan ta haci'e cada pasa un aña cu e meta di trece dilanti informacion actualisa pa e comunidad y pa por yuda hende biba un bida mas saludabel.

Pa loke ta e mensahe di minister di salud Alex Schwengle, nos por haci hopi nos mes y te hasta sin placa mes por haci hopi. "Come mas saludabel, come menos aki ta referi na porcionnan mas chikito, move mas, move tur dia, no huma. Alcohol si por please evite mes. Tin hopi cos cu bo por cambia den bo lifestyle cu lo agrega na un manera hopi positivo den bo salud y tambe den bo felicidad cu bo ta bay tin den bo bida".

"Mi ta hopi contento riba e invitacion akinan, ya cu esaki ta e manera di hala atencion di nos poblacion di Aruba over di su salud, y en particular su salud di curazon. Awendia cu nos tur ta hopi druk, nos ta nenga di saca un rato y dedica tempo na nos salud, especialmente ki e falta di actividad fisica y deporte", Dr Sprok a bisa NoticiaCla.com na occasion di e simposio aki. “Den e mundo cu nos ta biba, nos tin asina poco tempo cu nos ta come pafo di cas, cuminda rapido y poco saludable. E hecho di no haci deporte, come cuminda cu vet, fuma hopi, no controla efectivamente e enfermedadnan manera presion halto, sucu den sanger y gordura, ta incidi directamente den bo curazon, y por causa tanto malesa den e circulacion propio di curazon, tipo infarto, como problema di e diferente valve nan di e curazon. No tin miho inversion di haci cu inversion den bo salud. Ta e unico cu ta duna interes hopi bon, esta mas bida saludabel.”