Prioridad awor no ta pa controla distribuidor pa producto cu fecha venci

ORANJESTAD – Mientras cu na Corsou, companianan importado/distribudor ta hayando bishita practicamente tur dia di autoridad, aki na Aruba cos ta diferente. Manera cu NoticiaCla a raporta algun biaha caba, e departamento conoci como MEO, a y ta haciendo controlnan riguroso, confiscando miles di producto di cual nan fecha a vence. Aki na Aruba Dienst Warenkeuring en Hygiëne tin por lo menos 3 aña sin bishita e distribuidornan segun e hefe di e departamento Yvette Geerman a confirma pa e portal aki diabierna. E director di un di nan, COMPRA, esta Hubert Dirks ta confirma esey. “Den tur e añanan cu mi ta director, nunca mi wordo controla a base di e productonan cu expiration date” Dirks a bisa. Pa Geerman, e situacion no ta alarmante y un prioridad awor cu mester controla nan awor.

CONTROL PROPIO

Dirks a bisa cu nan mes ta tene nan controle. “Pero no nos no ta wordo controla. Mi ta kere cu e mester wordo haci” Dirks ta bisa. Mes momento Dirks ta bisa cu nan ta wordo bon controla door di e outlet cu nan ta bende. P.e. supermercadonan of minimarket ta check si bo productonan ta ok. Ademas companianan cu nan ta traha cune manera Md Donalds of otronan ta hopi estricto riba e tema di ‘expiration date’. Dirks ta sigui bisa cu, cu e sa, otro distribuidornan tampoco ta wordo controla. Un forma di control ta e audit mericano cu su base na Costa Rica. “Bo mester tin standard operating procedures. Den e SOP e expiration date ta clave. Bo ta wordo controla y certifica pa un di instancianan asina, por lo menos un of dos biaha pa aña.

E PROCESO DI EXPIRATION DATE

Un producto tin un expiration date, pa asina garantisa su calidad keda bon y saludabel pa e consumidor. Y e fechanan aki ta hopi estricto. E fecha ta un garantia pa e compania cu e ta di bon calidad y structura. “Tin hende ta uz'e como un sistema di bedrijfs economisch pa nan por bende mas, y aunke cu e producto ta bon, nan ta bisa cu e ta expired, pa nan bente afo. Pero esey ta storia di indjan” Dirks ta bisa. E consumidor cu ta usa productonan cu fecha venci, mes ta hinca su mes den problema y e compania cu ta provee e producto, no ta para garantia pa cualkier cos cu bay malo e ora. Den practica y dependiendo di e producto, lechi no ta cos di hunga cune. Y no ta solamente e fecha, sino con bo a maneha e producto, despues cu bo a cumpre. Como ehempel, si bo tin un producto cu ta den margen di e fecha, pero a wordo mal maneha (laga p.e pafo di frigidaire), tanto bal bo tin expiration date. Sigur riba un isla calor manera Aruba.

CONTROL DI GOBIERNO

Yvette Geerman cu ta hefe di e departamento encarga cu control riba e productonan cu ta vence, ta confirma cu enberdad pa como 3 aña, nan no a controla e distribuidornan. Nan enfoke ta mas riba e control riba supermercado y restaurantnan. Nan ta sali for di e punto di bista, cu e distribuidornan ta anda responsabel y cu nan sa di haci e control. Pero si den control na e.o un supermercado haya producto cu a vence, nan por bay na e distribuidor pa haci e control eynan. “E ora nos ta wak si enberdad nan tin cierto productonan cu nan fecha a vence, y cu nan ta bendiendonan na e supermercadonan” Geerman ta bisa. Ora cu esey sosode, nan ta haci un ‘medewerking tot vernietiging’ ariba dump cu ta sosode bou di supervision di e departamento di gobierno. E hecho cu na Corsou tin tanto atencion riba e caso aki na distribuidornan, no kier men cu na Aruba tambe nan tin cu haci esey, segun Geerman. “Nos ta asumi tambe cu como distribuidor, bo tin cierto responsabilidad y rol den comunidad. Anto nos no ta verwacht dibo cu bo ta bende producto cu fecha cu a vence” Geerman a bisa. “Esey no ta descarta cu distribuidornan ta haya bishita di nos como autoridad” Geerman a finalisa bisando.