Debate politico di KVK a duna un bista unda tur partido ta para

ORANJESTAD – E prome debate politico di Camara di Comercio ta tras di lomba. Cu un sala yen, tur esnan presente y esnan cu a presenta esaki via television por mira bek riba un anochi interesante. Expectativa tabata varia, mirando e set up di hopi candidato y poco tempo pa expresa. Sinembargo e formato a resulta interesante y hopi informativo. Loke a cuminsa un poco ‘strak’ rapidamente a los, segun e candidatonan tabata haya nan draai riba tarima.

PREGUNTA DI CALIDAD

E preguntanan a resalta di calidad y for di e candidatonan a haya un bon reaccion di esaki. Esun cu sigur a resalta tabata e candidato di partido RED, Ricardo Croes, cu a tuma e tarima y a tene e publico entretene. Otronan cu no a keda atras tabata Benny Nisbet di PPA, mientras cu Otmar Oduber a purba distancia su mes di e pasado di AVP, y lidernan di MEP y AVP a keda mas global y uza nan tempo pa presenta nan programa unda cu nan tabata por. En general, no tur ora e candidatonan tabata contesta e preguntanan, pero a haci ‘nan best’ pa duna e miho di nan mes.

PRESENTACION DI E CANDIDATONAN

Algun di e politiconan tabatin problema pa expresa nan mes, mientras cu otronan a mustra nan abilidad di domina nan mes den publico. Loke a resalta tabata e hecho cu por a mira cua partido tin trabou pa haci, y ken no. E preguntanan a cubri tur area di interes, aunke cu e contestanan no semper tabata refleha e contesta riba e pregunta.

REACCION DI E LIDERNAN POLITICO DESPUES DI E DEBATE

“Positivo. E tabata un debate cu ta marca e diferencia di partidonan cu ta blo papia di problema y e partido cu ta papia di e futuro, di e perspectiva di e oportunidadnan di crecemento di Aruba den un sentido positivo” Mike Eman, AVP.

“Un debate sumamente interesante. Naturalmente cu su momento chistoso. Na un forma hopi respetuoso apesar cu aki aya por mira cu ta purba tira dede den direccion, cu ta normal di un debate. Responsabilidad ta hopi mas grandi”. Otmar Oduber, POR

“E tabata un debate riba un bon nivel. Bo no ta haya hopi tempo pa expresa y trece bo punto dilanti. Pero e tabata un bon comienso, un bon paso” Evelyn Wever Croes, MEP

“E tabata un bon nivel. Kizas e minuut y mei tabata poco dificil pa presenta un opinion mas amplio. Sinembargo nos di PPA ta sumamente contento cu nos a haya e oportunidad pa participa den e debate aki” Benny Nisbet, PPA

“E tempo tabata limita, e plan di partido mes no por a wordo presenta, pero nos ta invita pueblo henter pa pasa bishita e facebook page di MAS pa Aruba pa asina haya mas informacion.- Holmo Henriquez, MAS

“Mi a hayele interesante. Preguntanan poco fastioso pero atrobe contesta cu curazon. Esey ta hopi importante. No cosnan traha, getrained. Nos ta contento cu e resultado” - Booshi Wever, UPP

“E debate tabata riba un bon nivel, e comportacion di tur candidato cu a presenta tabata excelente. Personalmente mi a haya presentacion di tur candidato bon. Tambe e pregunta riba un bon nivel y to the point”. – Ricardo Croes