Bureau Rampenbestrijding mester di voluntario pa oil spill

Posted on 6/8/2017, 5:48 PM AST | Updated on 6/8/2017, 5:49 PM AST

ORANJESTAD. - Bureau Rampenbestrijding haci un yamada na tur boluntarionan cu sea a registra of no a registra ainda, cu pa e siguiente 3 weekend nan lo tin mester di boso cooperacion. Manera nos tur ta na altura di dje cu na Aruba tin un cantidad grandi di persona cu abase boluntario ta desea pa duna un man pa cu e limpieza di nos beachnan cu a sufri daño di e oil spill cu a tuma luga ultimamente.

Pa e siguiente 3 weekend nan ta haci un yamada na tur e boluntarionan cu e registra caba y esunnan cu no a registra ainda pa planea e dia(nan) cu nan ta disponibel pa duna un man pa yuda haci nos beachnan limpi.

Diadomingo 11 di juni lo spera e prome grupo di boluntarionan na Parke Nacional Arikok pa asina cuminsa cu e limpiesa di e beach/bocanan den e parke di 7:00am te cu 11:00am.

Sea asina bon di yama na tel : 5851234 y registra e dia(nan) cu bo ta presente.

Meta principal di e accion di limpiesa aki ta pa e beachnan ta limpi y liber di “Tarballs” pa asina esakinan por wordo declara oficialmente dor di e departamento concerni cu nan ta ok pa uzo pa publico.

Kico ta sosode riba dia di e accionnan?

Tur boluntario ta bay na e centro di informacion den parke. Tur boluntario lo ricibi for di e park rangernan un splicacion di e trabounan cu mester wordo haci. Informacion di e beach/bocanan cu lo mester wordo haci limpi. Particion den gruponan. Informacion di siguridad.

Punto di atencion general.

Un yamada ta bay na tur boluntario y na e publico general cu pa locual ta e azeta pega riba e barancanan, esakinan no lo mishi cu nan den e fase aki. Tur boluntario mester tene na cuenta cu nan siguridad ta na prome luga, pues ta pidi tur cu ta yuda pa nan no hinca nan mes den situacionnan di peliger durante di e trabounan di limpiesa. Pues no bay na areanan caminda cu e lama ta demaciado bruto, riba piedranan skerpi caminda cu por haci daño na bo persona of drenta den e awa sin cu bo por landa etc. Tur boluntario ta wordo pidi pa ta bisti adecuadamente y tambe haci uzo di proteccion necesario mirando cu nos solo ta fuerte.

 

Bureau Rampenbestrijding Aruba kier a gradici di antemano den nomber di tur e departamentonan cu a traha pa cu e incidente aki di oil spill, tur boluntario pa nan interes, motivacion y dedicacion pa cu e limpiesa di nos beachnan.

Proximo fechanan di limpiesa ta 17 – 18 – 24 – 25 di juni 2017 di 7:00am te cu 11:00am