Encuesta politico #2: Debate por determina patronchi di voto

ORANJESTAD – Gran mayoria di esnan cu a participa den e di dos encuesta politico di NoticiaCla/Doc Opleiding kier pa un coalision y no un gobierno di un solo partido, ta kere cu debate ta importante pa determina nan decision, y ta sinti cu mester tin un ley di financiamento di partido prome cu eleccion awor. Notabel ta cu e encuesta a conta cu dobel e cantidad di persona cu a participa, compara cu esun prome. Corda cu esaki ta un encuesta digital, anonimo, cu tin su efectonan positivo y negativo.

RESULTADO INICIAL

Compara cu biaha pasa, un total di 2192 persona a participa, y 1792 a completa e encuesta completo cu ta 2.4% di e poblacion cu a vota den e ultimo eleccion (75 mil habitante). E cantidad mas grandi di participante tabata masculino (57.1%) vs e dama cu tabata 42.6%. Y e mayoria di esnan cu a participa, tabata procedente di Noord, Oranjestad, Paradera y Santa Cruz.

UN SOLO PARTIDO OF COALISHON

Manera indica, e encuesta aki a haci cierto preguntanan hopi specifico y aki tambe e resultado tabata interesante. Entre nan, si e comunidad ta prefera un coalision, gobierno di un solo partido of no. Aki e mayoria (62%) a bisa cu nan kier un coalision y 22% a pidi pa un gobierno di un solo partido. Sinembargo ora cu segmenta esaki den partidonan politico, esnan cu a vota pa AVP, 65% a pidi pa un solo partido, mientras cu esnan di MEP 50% a pidi pa un coalision y 36% pa un solo partido. Ambos ta partidonan cu a goberna durante e ultimo 16 añanan aki cu un solo partido, parti pa 8 aña cada un.

DEBATE TA IMPORTANTE OF NO

Na vispera di e debate di Camara di Comercio, e interes aki tambe tabata interesante. Aki mayoria a bisa cu dependiendo con e debate su formato ta, e por ta determinante pa e decision (37.7%). E siguiente grupo a bisa solamente cu enberdad un debate ta crucial (36.8%). E di tres grupo, algo mas cu 20% a bisa cu un debate no tin impacto riba e eleccion y con e persona ta vota.

MAS DATOS

Un pregunta sensitivo pero alcaso, ta e integridad di e politico. E pregunta cu si un politico mester ta integro, los di cualkier investigacion a resulta importante. Gran mayoria a mustra cu nan lo no vota pa un persona cu ta bou di investigacion. Pero ora cu ta check esnan di AVP cu a vota, mayoria (69%) ta bisa cu e mester por participa, tanten cu no tin un sentencia duna contra e persona aki mientras cu 21% di esnan di AVP ta sinti cu e persona ey no por participa. Pa loke ta campaña, mayoria di esnan encuesta, ta kere cu e campaña ta mucho largo, den sentido cu nan ta kere cu 3 luna prome cu eleccion ta suficiente tempo pa cuminsa campaña. E di tres grupo ta haya cu mester cuminsa campaña despues cu a entrega lista. E di cuater grupo kier pa campaña tur ora.

PARTIDO MAS GRANDI

E parti sigur mas interesante pa hopi, ta cua partido ta esun mas popular aworaki. Den e caso anterior, partido MEP a score mas halto sigui pa e grupo cu ta indeciso, y despues partido AVP. Den e encuesta aki, e secuencia aki a cambia. Tambe por raporta cu tabatin algo hopi curioso, den sentido cu e cantidad cu a pone AVP como partido, a baha drasticamente, esun cu ta indeciso a baha, y esun di MEP a aumenta. Den e encuesta aki, MEP ta sali esun mas grandi sigui pa e grupo cu ta indeciso, sigui pa partido POR, y despues partido AVP. Den combersacion cu integrantenan di e partido berde y nan specialistanan, a compronde e.o. cu nan no ta kere den encuestanan manera esaki, y no ta hopi inclina pa participa. Nan ta kere mas den encuestanan otro cu e partido mes ta laga haci proximamente. Esey ta splica e resistencia di participa e biaha aki y den e forma aki. Atrobe, e encuesta aki ta un medio cientifico electronico, cu tin su beneficio y tambe su puntonan negativo cu ne. Por mira e resultado completo AKI.